اسٹیج، فلم اور ڈراما کا درخشاں چراغ بجھ گیا، عہد ساز اداکار طویل علالت کے بعد دنیا سے رخصت

پاکستان ٹیلی ویژن، اسٹیج اور فلم انڈسٹری کے سینیئر اور نامور اداکار عاصم بخاری انتقال کرگئے، ان کی وفات کی خبر سامنے آتے ہی شوبز حلقوں اور مداحوں میں گہرے رنج و غم کی لہر دوڑ گئی۔

خاندانی ذرائع کے مطابق 76 سالہ اداکار عاصم بخاری کافی عرصے سے مختلف بیماریوں میں مبتلا تھے اور گزشتہ 15 روز سے لاہور کے ایک نجی اسپتال میں زیر علاج تھے۔ بتایا گیا ہے کہ گزشتہ رات ان کی طبیعت اچانک زیادہ خراب ہوگئی تھی جس کے بعد وہ کوما میں چلے گئے اور جمعرات کی صبح وہ اپنے خالق حقیقی سے جا ملے۔

یہ بھی پڑھیں:اداکارہ صاحبہ اور ریمبو کا چھوٹے بیٹے کی شادی سے متلعق اہم انکشاف

اہل خانہ کے مطابق عاصم بخاری طویل عرصے سے گردوں اور دل کے عارضے میں مبتلا تھے۔ ڈاکٹروں کی جانب سے انہیں مسلسل طبی نگہداشت فراہم کی جارہی تھی مگر بیماری کے باعث ان کی صحت بتدریج کمزور ہوتی چلی گئی۔

ان کے انتقال کی خبر جیسے ہی منظر عام پر آئی تو شوبز انڈسٹری کی نمایاں شخصیات، فنکاروں اور مداحوں نے گہرے دکھ اور افسوس کا اظہار کیا۔ سوشل میڈیا پر متعدد فنکاروں نے تعزیتی پیغامات جاری کرتے ہوئے مرحوم کی فنی خدمات کو خراج عقیدت پیش کیا اور کہا کہ عاصم بخاری ایک عہد ساز اداکار تھے جنہوں نے اپنی محنت اور لگن سے اداکاری کو نئی جہتیں دیں۔

عاصم بخاری نے اپنے طویل فنی سفر کے دوران پاکستان ٹیلی ویژن کے متعدد مقبول ڈراموں میں اداکاری کی اور اپنے منفرد انداز، مضبوط مکالمہ ادائیگی اور کردار میں مکمل ڈوب جانے کی صلاحیت کے باعث ناظرین کے دلوں میں خاص مقام بنایا۔ انہوں نے اسٹیج ڈراموں میں بھی بے شمار یادگار کردار ادا کیے جبکہ فلمی دنیا میں بھی اپنی صلاحیتوں کا لوہا منوایا۔

عاصم بخاری ان اداکاروں میں شمار ہوتے تھے جو کردار کی روح کو سمجھ کر اسے حقیقت کے قریب لے آتے تھے۔ یہی وجہ تھی کہ ان کے ادا کیے گئے کردار آج بھی ناظرین کے ذہنوں میں زندہ ہیں۔

مرحوم اداکار نہ صرف ایک باصلاحیت فنکار تھے بلکہ انہیں اداکاری کا استاد بھی سمجھا جاتا تھا۔ انہوں نے اپنے تجربے اور رہنمائی سے کئی نوجوان فنکاروں کی تربیت میں اہم کردار ادا کیا اور نئی نسل کو فن اداکاری کے رموز سکھائے۔

شوبز حلقوں کا کہنا ہے کہ عاصم بخاری نے کئی دہائیوں تک پاکستانی ڈراموں اور اسٹیج کو اپنی خدمات دیں اور ان کا نام ان فنکاروں میں شمار ہوتا ہے جنہوں نے پاکستان کے ثقافتی منظرنامے کو مضبوط بنانے میں اہم کردار ادا کیا۔

مزید پڑھیں:معروف اداکار طلعت حسین انتقال کر گئے

ان کے انتقال سے پاکستان کی فنون لطیفہ کی دنیا ایک تجربہ کار، باصلاحیت اور مخلص فنکار سے محروم ہوگئی ہے۔ مداحوں کا کہنا ہے کہ عاصم بخاری کی اداکاری، ان کا منفرد انداز اور یادگار کردار ہمیشہ یاد رکھے جائیں گے۔

خاندانی ذرائع کے مطابق مرحوم کی نماز جنازہ اور تدفین کے حوالے سے شیڈول کا اعلان جلد کیا جائے گا۔ اہل خانہ اور قریبی عزیزوں نے مداحوں سے مرحوم کے لیے دعائے مغفرت کی اپیل کی ہے۔

واضح رہے کہ عاصم بخاری کے صاحبزادے اجلال بخاری بھی اس وقت لندن کے ایک اسپتال میں زیر علاج ہیں جس کے باعث خاندان پہلے ہی ایک مشکل صورتحال سے گزر رہا تھا۔

فنکار برادری کا کہنا ہے کہ عاصم بخاری کا انتقال پاکستانی شوبز انڈسٹری کے لیے ایک بڑا نقصان ہے اور ان کی کمی طویل عرصے تک محسوس کی جاتی رہے گی۔