تہران میں سپریم لیڈر آیت اللہ علی خامنہ ای کی شہادت کے بعد قائم ہونے والی عبوری قیادت کونسل میں آیت اللہ علی رضا اعرافی کو بھی رکن مقرر کر دیا گیا ہے۔
ایرانی میڈیا کے مطابق یہ تقرری موجودہ حساس حالات میں ریاستی اور انتظامی تسلسل کو برقرار رکھنے کے لیے کی گئی ہے، آیت اللہ علی رضا اعرافی دہائیوں سے ایران کے دینی، تعلیمی اور انتظامی اداروں میں خدمات انجام دیتے رہے ہیں اور انہیں مذہبی و علمی حلقوں میں اہم مقام حاصل ہے۔
آیت اللہ علی رضا اعرافی 1959 میں یزد صوبے کے شہر میبوڈ میں پیدا ہوئے وہ ایک مذہبی گھرانے سے تعلق رکھتے ہیں اور اپنی زندگی کا بڑا حصہ دینی تعلیم اور انتظامی امور کی خدمت کے لیے وقف کر چکے ہیں۔
ان کا علمی اور انتظامی کیریئر مرحوم سپریم لیڈر آیت اللہ علی خامنہ ای کے دور میں تیزی سے ترقی کرتا رہا، جنہوں نے انہیں مختلف اہم ذمہ داریاں سونپیں، ان ذمہ داریوں میں میبوڈ اور بعد ازاں قم میں جمعہ کی نماز کی امامت شامل تھی، جو اعلیٰ قیادت کے اعتماد کی علامت سمجھی جاتی ہے۔
انہوں نے المصطفیٰ انٹرنیشنل یونیورسٹی کی صدارت بھی سنبھالی، جو ایران اور بیرونی ممالک سے آنے والے علما کی تربیت کے لیے ایک اہم تعلیمی ادارہ شمار ہوتا ہے، یہ ادارہ مذہبی تعلیم اور بین الاقوامی سطح پر علمی تبادلے کو فروغ دینے میں کردار ادا کرتا ہے۔
2019 میں آیت اللہ علی رضا اعرافی کو گارڈین کونسل ایران کا رکن بھی بنایا گیا، جو ایران کا آئینی ادارہ ہے اور قانون سازی کے امور کی نگرانی سمیت صدارتی اور پارلیمانی امیدواروں کی منظوری کا اختیار رکھتا ہے۔
موجودہ صورتحال میں آیت اللہ علی رضا اعرافی کو خطے میں بڑھتی ہوئی کشیدگی اور داخلی استحکام کے چیلنجز کا سامنا ہے، انہیں ایران کی قیادت کے عبوری مرحلے میں اہم کردار ادا کرنا ہوگا کیونکہ علاقائی حالات اور سکیورٹی مسائل ملکی سیاست پر اثر انداز ہو سکتے ہیں۔
By 
