سرفراز احمد کو پاکستان ٹیسٹ ٹیم کا ہیڈ کوچ بنانے کا فیصلہ

پاکستان کرکٹ ٹیم کے سابق کپتان سرفراز احمد کو قومی ٹیسٹ کرکٹ ٹیم کا ہیڈ کوچ بنانے کا فیصلہ کیا گیا ہے۔

میڈیا رپورٹس کے مطابق اس حوالے سے ذرائع پی سی بی کا کہنا ہے کہ سرفراز احمد کی تقرری کا باضابطہ اعلان جلد کیا جائے گا، وہ پاکستان کی بنگلادیش کے ساتھ ٹیسٹ سیریز میں ذمے داریوں کا آغاز کریں گے۔

واضح رہے کہ پاکستان ٹیسٹ ٹیم کے کوچ کا عہدہ خالی تھا، اظہر محمود جنوبی افریقا کے خلاف سیریز میں عبوری ہیڈ کوچ تھے ، قومی ٹیم مئی میں بنگلادیش کے خلاف 2 ٹیسٹ میچز کی سیریز کھیلے گی، یہ ٹیسٹ سیریز ورلڈ ٹیسٹ چیمپئن شپ 2027 کا حصہ ہے۔

یہ بھی پڑھیں : ٹی 20 ورلڈ کپ کا پہلا سیمی فائنل آج ، جنوبی افریقا اور نیوزی لینڈ مدمقابل

پاکستان اور بنگلادیش کے درمیان پہلا ٹیسٹ میچ 8 مئی اور دوسرا ٹیسٹ میچ 16 مئی سے شروع ہو گا۔

سرفراز احمد کو پاکستان انڈر 19 ٹیم کا مینٹور مقرر کیا گیا تھا جن کی سربراہی میں ٹیم نے ایشیا کپ جیتا تھا جبکہ حال ہی میں ہونے والے انڈر 19 ورلڈکپ کے لیے بھی سرفراز احمد نے مینٹور کی ذمہ داریاں نبھائی تھیں۔

یہ بھی پڑھیں : ٹی 20 ورلڈکپ میں آئی سی سی کا بڑا فیصلہ، سیمی فائنل کا شیڈول تبدیل

سرفراز احمد کی ممکنہ تقرری کو قومی ٹیم کے لیے ایک نئے باب کے آغاز کے طور پر دیکھا جا رہا ہے، اور شائقین کو امید ہے کہ ان کی قیادت میں ٹیسٹ ٹیم مزید مضبوط اور منظم انداز میں میدان میں اترے گی۔