By ایران پر امریکا اور اسرائیل کے حملوں کے بعد خطے میں پیدا ہونے والی کشیدہ صورتحال نے بیرونِ ملک سفر کرنے والے پاکستانیوں کیلئے غیر معمولی مشکلات کھڑی کر دی ہیں۔
ویزا اور کنفرم ٹکٹ رکھنے کے باوجود بڑی تعداد میں مسافر پروازوں کی منسوخی اور محدود آپریشن کے باعث ایئرپورٹس پر پھنس گئے ہیں جبکہ خلیجی ممالک جانے والی بیشتر پروازیں تاحال معطل یا انتہائی محدود ہیں۔
اوورسیز ایمپلائمنٹ پروموٹرز ایسوسی ایشن کے سابق نائب صدر عدنان پراچہ کے مطابق موجودہ صورتحال میں سب سے زیادہ متاثر وہ افراد ہیں جو ملازمت یا عمرہ کی غرض سے خلیجی ممالک جانا چاہتے تھے۔ ان کا کہنا ہے کہ امریکا، اسرائیل اور ایران کے درمیان کشیدگی کے باعث خلیجی خطہ بھی غیر یقینی صورتحال کا شکار ہے جس کی وجہ سے پاکستان سے متحدہ عرب امارات، قطر، بحرین اور عمان جانے والی پروازوں کی کنیکٹیویٹی بری طرح متاثر ہوئی ہے۔
یہ بھی پڑھیں:بیرون ملک جانیوالے شہریوں کیلئے فلائٹس سے متعلق اہم خبر
انہوں نے بتایا کہ سعودی عرب کیلئے بھی صورتحال مکمل طور پر معمول پر نہیں، تاہم جدہ، ریاض اور دمام کیلئے محدود پروازیں دستیاب ہیں۔ عمرہ زائرین کی بڑی تعداد کے باعث ان روٹس پر بھی شدید دباؤ ہے۔ کرایوں میں غیر معمولی اضافہ دیکھنے میں آیا ہے اور جو ٹکٹ چند روز قبل تقریباً 65 ہزار روپے میں دستیاب تھا وہ اب ایک لاکھ دس سے ایک لاکھ بیس ہزار روپے تک بھی دستیاب نہیں، جس سے مسافروں کی مشکلات میں مزید اضافہ ہو گیا ہے۔
ذرائع کے مطابق کارروائیوں کے آغاز پر کراچی ایئرپورٹ پر متعدد غیر ملکی طیارے موجود تھے تاہم فضائی حدود کی غیر یقینی صورتحال کے باعث وہ مرحلہ وار اپنے ممالک واپس چلے گئے۔ اس وقت خلیجی ممالک کی اکثر پروازیں بند ہیں جس سے ایوی ایشن انڈسٹری کو بھی مالی نقصان کا سامنا ہے جبکہ ایسے ورکرز جن کے ویزے لگ چکے ہیں اور مدت ختم ہونے کے قریب ہے، شدید پریشانی میں مبتلا ہیں۔
یہ بھی پڑھیں:امریکا کے پاس موجود ہتھیاروں کا ذخیرہ کتنا ہے؟ٹرمپ نے اہم انکشاف کر دیا
