By ایران کی عسکری قیادت نے مشرقِ وسطیٰ کی کشیدہ صورتحال کے تناظر میں ایک انتہائی سخت اور جارحانہ بیان جاری کرتے ہوئے دعویٰ کیا ہے کہ عالمی تجارت کے لیے کلیدی اہمیت رکھنے والی گزرگاہ، آبنائے ہرمز اور دیگر قریبی سمندری راستوں پر اسے مکمل کنٹرول حاصل ہے۔
تفصیلات کے مطابق ایرانی حکام کا کہنا ہے کہ خطے میں موجود امریکی اور اسرائیلی بحری جہاز ان کے نشانے پر ہیں اور کسی بھی اشتعال انگیزی کی صورت میں انہیں “شکار” بنانے میں دیر نہیں کی جائے گی۔
اس بیان میں واضح کیا گیا ہے کہ ایران کی بحری قوت اور ساحلی دفاعی نظام اس قدر مستحکم ہے کہ وہ دشمن کی ہر نقل و حرکت پر نظر رکھے ہوئے ہے۔ ایرانی کمانڈرز کے مطابق آبنائے ہرمز کی سیکیورٹی اور وہاں سے گزرنے والے جہازوں کا فیصلہ اب تہران کی مرضی کے مطابق ہوگا، اور اگر ایران کے مفادات کو نقصان پہنچانے کی کوشش کی گئی تو وہ ان تجارتی راستوں کو دشمن کے لیے جہنم بنا دیں گے۔
اس دھمکی آمیز بیان نے عالمی سطح پر تشویش کی لہر دوڑا دی ہے کیونکہ آبنائے ہرمز کی بندش یا وہاں فوجی کارروائی سے عالمی معیشت اور تیل کی سپلائی بری طرح متاثر ہونے کا خدشہ ہے۔
پاسداران انقلاب نے واضح کیا ہے کہ آبنائے ہرمز سے گزرنے والے کسی بھی امریکی یا اسرائیلی جہاز کو نشانہ بنایا جا سکتا ہے۔ ان کے بقول، خطے میں جاری کشیدگی کے دوران ایران سمندری راستوں پر مکمل کنٹرول رکھے گا اور آبنائے ہرمز سے تیل کا ایک قطرہ بھی بلا اجازت نہیں گزرنے دیا جائے گا۔
مزید پڑھیں: امریکی سینیٹ میں ٹرمپ کو جھوٹا قرار دے دیا گیا،فیصلوں پر کڑی تنقید
