چینی برانڈ کی پہلی جدید ترین گاڑی پاکستان میں۔۔۔،شوقین افراد کیلئے بڑی خبر

ماسٹر چنگان موٹرز لمیٹڈ نے پاکستان کی آٹوموبائل صنعت میں ایک اہم سنگِ میل عبور کرتے ہوئے ڈیپال ایس زیرو فائیو رینج ایکسٹینڈڈ الیکٹرک وہیکل کی کمرشل پیداوار کا آغاز کر دیا ہے، جو ملک کی پہلی مقامی طور پر اسمبل کی جانے والی پریمیم رینج ایکسٹینڈڈ الیکٹرک اسپورٹس یوٹیلیٹی گاڑی ہے۔

پاکستان آٹو شو دو ہزار پچیس میں چودہ نومبر کو متعارف کرائے جانے کے بعد ڈیپال ایس زیرو فائیو رینج ایکسٹینڈڈ الیکٹرک وہیکل اب ڈیلیوری کے مرحلے میں داخل ہو چکی ہے۔ گاڑی کی تیاری کراچی میں واقع ماسٹر چنگان کے جدید مینوفیکچرنگ پلانٹ میں کی جا رہی ہے، جہاں جدید روبوٹکس اور نئے پیداواری نظام کے ذریعے کمپنی نے نوّے دن سے بھی کم عرصے میں مشینری کی تنصیب سے مکمل پیداوار تک کا سفر طے کیا۔

یہ بھی پڑھیں:چینی گاڑی ہیول کی حیران کن پیشکش، صارفین کے لیے کیا نیا آنے والا ہے؟

اس پیش رفت کے بعد ماسٹر چنگان پاکستان میں چوتھی بڑی آٹوموبائل برانڈ کے طور پر اپنی پوزیشن مزید مضبوط کر چکی ہے، جبکہ اب تک ملک بھر میں پینسٹھ ہزار سے زائد صارفین کو گاڑیاں فراہم کی جا چکی ہیں۔

ڈیپال ایس زیرو فائیو رینج ایکسٹینڈڈ الیکٹرک وہیکل کا اجرا ماسٹر چنگان کے نئے برانڈ فلسفے ’’موونگ دی نیو جنریشن‘‘ کی عملی تصویر ہے، جس کا مقصد پاکستان میں نئی توانائی پر چلنے والی گاڑیوں کو متعارف کرانا ہے۔ اس وژن کے تحت الیکٹرک نقل و حرکت کو مقامی انفراسٹرکچر اور ڈرائیونگ حالات کے مطابق آسان اور قابلِ عمل بنانے پر توجہ دی جا رہی ہے۔

اس موقع پر گفتگو کرتے ہوئے ماسٹر چنگان موٹرز کے چیف ایگزیکٹو افسر دانیال ملک نے کہا کہ کمپنی کا مقصد صرف نئی گاڑیاں متعارف کرانا نہیں بلکہ ایسی جدت لانا ہے جو پاکستان کے لیے عملی اور مؤثر ثابت ہو۔ ان کا کہنا تھا کہ ڈیپال ایس زیرو فائیو صارفین کے اہم خدشات، بالخصوص سفر کی حد سے متعلق بے چینی، کو مؤثر انداز میں حل کرتی ہے اور حقیقی الیکٹرک ڈرائیونگ کا تجربہ فراہم کرتی ہے۔

یہ بھی پڑھیں:چینی برانڈ کی نئی گاڑی جیکو میں تکنیکی خرابیوں کا انکشاف،کمپنی نے گاڑیاں واپس منگوا لیں

ڈیپال ایس زیرو فائیو رینج ایکسٹینڈڈ الیکٹرک وہیکل کی مجموعی ڈرائیونگ رینج ایک ہزار کلومیٹر سے زائد ہے۔ یہ گاڑی روایتی یا پلگ اِن ہائبرڈ کے برعکس مکمل طور پر الیکٹرک ڈرائیو پر چلتی ہے اور فوری طاقت فراہم کرتی ہے۔

گاڑی میں ستائیس اعشاریہ اٹھائیس کلو واٹ آور گولڈن شیلڈ بیٹری نصب ہے، جبکہ آن بورڈ رینج ایکسٹینڈر صرف ضرورت کے وقت بیٹری کو ری چارج کرنے کے لیے بطور جنریٹر کام کرتا ہے۔ چنگان کے ای پی اے ون خالص الیکٹرک پلیٹ فارم پر تیار کی گئی اس گاڑی میں وزن کی متوازن تقسیم رکھی گئی ہے، جو بہتر ہینڈلنگ اور ہموار ڈرائیونگ کو یقینی بناتی ہے۔