بیرون ملک جانیوالے پاکستانیوں کیلئے پروازوں سے متعلق اہم خبر

ملک بھر کے مختلف ہوائی اڈوں سے خلیجی ممالک جانے والی پروازوں کی بڑے پیمانے پر منسوخی کے باعث فضائی سفر شدید متاثر ہوا ہے جس سے ہزاروں مسافروں کو مشکلات کا سامنا کرنا پڑ رہا ہے۔

ایئرپورٹ ذرائع کے مطابق مجموعی طور پر 58 پروازیں منسوخ کی گئی ہیں، جن میں زیادہ تر پروازیں خلیجی ممالک کے لیے روانہ ہونا تھیں۔ پروازوں کی اچانک منسوخی کے باعث مسافروں کو نہ صرف تاخیر بلکہ سفری شیڈول میں غیر یقینی صورتحال کا بھی سامنا ہے۔

علامہ اقبال انٹرنیشنل ایئرپورٹ سے ابوظبی، دبئی اور شارجہ کے لیے آنے اور جانے والی 6 پروازیں منسوخ کی گئیں، جس سے بیرونِ ملک جانے والے مسافر خاص طور پر متاثر ہوئے۔

یہ بھی پڑھیں:جنگ بندی کے اعلان کے بعد عالمی مارکیٹ میں تیل کی قیمتیں تیزی سے گر گئیں

اسی طرح اسلام آباد انٹرنیشنل ایئرپورٹ سے دبئی، ابوظبی، الفجیرہ، شارجہ، جدہ، ریاض اور العین کے لیے مجموعی طور پر 24 دوطرفہ پروازیں منسوخ ہوئیں، جو اس صورتحال کا سب سے بڑا حصہ ہے۔

باچا خان انٹرنیشنل ایئرپورٹ سے دوحہ، دبئی، ابوظبی اور الفجیرہ کے لیے 12 پروازیں منسوخ کی گئیں، جس کے باعث خیبر پختونخوا سے سفر کرنے والے مسافروں کو شدید مشکلات پیش آئیں۔

دوسری جانب جناح انٹرنیشنل ایئرپورٹ سے دبئی، ابوظبی، مشہد، بحرین، شارجہ اور مسقط کے لیے 16 پروازیں منسوخ ہوئیں، جس سے ملک کے سب سے بڑے شہر میں بھی فضائی آپریشن متاثر رہا۔

ذرائع کا کہنا ہے کہ پروازوں کی منسوخی کے باعث ایئرپورٹس پر مسافروں کا رش بڑھ گیا ہے، جبکہ کئی افراد کو اپنی پروازوں کے ازسرِ نو شیڈول کے لیے طویل انتظار کرنا پڑ رہا ہے۔ مسافروں نے متعلقہ حکام سے مطالبہ کیا ہے کہ انہیں بروقت معلومات فراہم کی جائیں اور متبادل انتظامات کو یقینی بنایا جائے۔

موجودہ علاقائی صورتحال اور خلیجی فضائی حدود میں ممکنہ رکاوٹیں ان منسوخیوں کی بڑی وجہ ہو سکتی ہیں، تاہم متعلقہ اداروں کی جانب سے باضابطہ وضاحت کا انتظار ہے۔