خیبر پختونخوا میں بارشوں سے 30 اموات، 140گھر تباہ، پی ڈی ایم اے کی رپورٹ جاری

خیبرپختونخوا میں بارشوں سے جانی و مالی نقصانات کے حوالے سے پی ڈی ایم اے رپورٹ جاری کردی۔ 

رپورٹ کے مطابق 25 مارچ سے جاری بارشوں کے باعث اب تک صوبے کے مختلف اضلاع میں 30 افراد جاں بحق اور 85 زخمی ہوئے ہیں، جاں بحق افراد میں 20 بچے، 5 مرد اور 5 خواتین شامل ہیں جبکہ زخمیوں میں 36 مرد، 11 خواتین اور 38 بچے ہیں۔

بارشوں کی وجہ سے مجموعی طور پر 140 گھر متاثر ہوئے ہیں ، جن میں 115 کو جزوی اور 25 کو مکمل نقصان پہنچا، متاثرہ اضلاع میں بنوں، ایبٹ آباد، کوہاٹ، پشاور، نوشہرہ، باجوڑ، لکی مروت، کرم، ہنگو، شانگلہ، بونیر، مالاکنڈ، دیر اپر، بٹگرام، شمالی وزیرستان اور ٹانک شامل ہیں۔

یہ بھی پڑھیں : کڑے وقت میں حقیقی ریلیف، وفاق ، پنجاب میں بس اور ٹرین کا سفر مفت! پختونخوا حکومت کی بے حسی عروج پر، عوام آسانی کو ترس گئی

پی ڈی ایم اے اور ریسکیو 1122 کی ٹیمیں امدادی سرگرمیاں جاری رکھے ہوئے ہیں۔

ڈی جی پی ڈی ایم اے نے ضلعی انتظامیہ کو ہدایت کی ہے کہ متاثرین کو فوری امدادی سامان فراہم کیا جائے اور امدادی کارروائیاں تیز کی جائیں۔

پی ڈی ایم اے نے عوام سے اپیل کی ہے کہ بلاوجہ سفر سے گریز کریں اور حکومتی الرٹس اور ہدایات پر عمل کریں۔