کڑے وقت میں حقیقی ریلیف، وفاق ، پنجاب میں بس اور ٹرین کا سفر مفت! پختونخوا حکومت کی بے حسی عروج پر، عوام آسانی کو ترس گئی

خطے میں جاری کشیدگی کے باعث ملک سخت مشکل حالات سے گزر رہا ہے اور ان حالات میں عوام کو ریلیف فراہم کرنے کے لیے وفاقی دارالحکومت اور پنجاب میں عوام کیلئے پبلک ٹرانسپورٹ کو مفت کر دیا گیا ہے تاہم خیبرپختونخوا کےعوام کی نظریں تاحال اپنی صوبائی حکومت پر ہیں ۔ 

وزیراعظم کی خصوصی ہدایت پر کل سے اسلام آباد میں عام عوام کے لیے تمام بس اور ٹرین خدمات اگلے 30 دنوں کے لیے بلا معاوضہ فراہم کی جائیں گی۔

وفاقی وزیر داخلہ محسن نقوی نے ایک بیان میں کہا کہ یہ اقدام شہریوں کو مالی ریلیف دینے اور روزمرہ سفر کو آسان بنانے کے لیے اٹھایا گیا ہے۔

وفاقی وزیرپارلیمانی امور ڈاکٹر طارق فضل چودھری نے بھی ایک بیان میں وفاق اور پنجاب کی جانب سے عوام کو فراہم کی گئی اس سہولت سے آگاہ کیا ۔

وفاقی حکومت کا اسلام آباد میں کل سے تمام پںلک ٹرانسپورٹ فری کرنے کا اعلان ایک ماہ تک پبلک ٹرانسپورٹ مفت ہو گی ، جب کہ وزیراعلی پنجاب مریم نواز نے بھی پنجاب میں پبلک ٹرانسپورٹ مفت چلانے کا اعلان کیا ہے ، مشکل میں حکومت عوام کو سہولت دینے کے لئے ہر ممکن تعاون کی کوشش کرے گی

— Dr. Tariq Fazal Ch. (@DrTariqFazal) April 3, 2026

اس کے ساتھ ساتھ پنجاب حکومت کیجانب سے بھی شہریوں کو بڑاریلیف دیا گیا ہے جہاں وزیرِ اعلیٰ مریم نواز نے پنجاب کے تمام شہروں میں چلنے والی پبلک ٹرانسپورٹ فری کرنے کا اعلان کر دیا۔

یہ بھی پڑھیں : وفاقی دارالحکومت اسلام آباد میں ایک ماہ کیلئے پبلک ٹرانسپورٹ مفت کرنے کا اعلان

اورنج لائن ٹرین، میٹرو بس سروس، گرین الیکٹرو بس، اسپیڈو بس کے مسافروں کو ٹکٹ خریدنا نہیں پڑے گا۔

وزیرِ اعلیٰ پنجاب کا کہنا ہے کہ مشکل حالات میں عوام کو تنہا نہیں چھوڑیں گے، غیرمعمولی حالات میں شہری ذاتی سواری کے بجائے پبلک ٹرانسپورٹ استعمال کریں۔

پنجاب اور وفاق نے اپنے شہریوں کیلئے ٹرانسپورٹ جیسی بڑی سہولت میں آسانی پیدا کی ہے اور عوام کو اس مشکل وقت سے نکالنے میں ان کا حقیقی معنوں میں ساتھ دیا ہے تاہم خیبرپختونخوا حکومت کی بے حسی کہیں یا وہ ابھی تک خواب خرگوش کے مزے لوٹ رہی  ہے ، پختونخوا کی عوام اس مشکل وقت میں اپنی صوبائی حکومت کے ریلیف کی منتظر نظر آتی ہے۔

یاد رہے کہ حکومت نے گزشتہ روز پٹرول کی قیمت میں 137.23 روپے اضافہ کرتے ہوئے نئی قیمت 458 روپے 41 پیسے جبکہ ہائی سپیڈ ڈیزل کی فی لیٹر قیمت 184.49 روپے بڑھاتے ہوئے نئی قیمت 520 روپے 35 پیسے مقرر کر دی ہے۔