پاکستان پہلے کوانٹم کمپیوٹنگ ہیکاتھون کی میزبانی کے لیے تیار

پاکستان اپنے پہلے کوانٹم کمپیوٹنگ ہیکاتھون کی میزبانی کے لیے تیار ہے، جو 6 تا 8 فروری قومی مرکز برائے فزکس ، اسلام آباد میں منعقد ہوگا۔

اس تین روزہ پروگرام میں نوجوان محققین اور اختراعی ذہن شریک ہوں گے تاکہ کوانٹم پر مبنی حل تیار کیے جا سکیں جو اقوام متحدہ کے پائیدار ترقی کے اہداف (SDGs) سے ہم آہنگ ہوں۔

یہ ہیکاتھون پاکستان انسٹیٹیوٹ آف انجینئرنگ اینڈ اپلائیڈ سائنسز (PIEAS)، نیشنل انسٹیٹیوٹ آف لیزرز اینڈ آپٹرونکس (NILOP) کے اشتراک سے منعقد کیا جا رہا ہے، جو پاکستان ایٹمی توانائی کمیشن (PAEC) کے تحت کام کر رہا ہے، اور نیشنل سینٹر فار فزکس (NCP) کے تعاون سے ہو رہا ہے۔

بین الاقوامی سطح پر اس کی معاونت اوپن کوانٹم انیشیٹیوز (OQI) اور یورپی کونسل برائے نیوکلئیر ریسرچ (CERN) کے ذریعے کی جا رہی ہے، جو اقوام متحدہ کی سائنسی سفارت کاری کے اقدام کے تحت ہے۔

ملک بھر سے 950 سے زائد درخواستیں موصول ہوئیں، جن میں سے سخت مقابلے کے بعد 42 فائنلسٹ منتخب کیے گئے ہیں۔ یہ فائنلسٹ سات ٹیموں میں تقسیم ہوں گے اور قومی و بین الاقوامی ماہرین کی رہنمائی میں جدید کوانٹم پروسیسنگ یونٹس تک رسائی حاصل کریں گے۔

سی ای آر این ہیکاتھون میں تکنیکی رہنمائی، سرٹیفیکیشنز اور انعامات کے ذریعے معاونت فراہم کر رہا ہے، جبکہ امریکی، سوئٹزرلینڈ اور پاکستان کے بین الاقوامی جج فائنل پروجیکٹس کا جائزہ لیں گے۔

یہ بھی پڑھیں: مسلح افواج جدید ٹیکنالوجی کے ساتھ منفرد صلاحیتوں پرتوجہ دی رہی ہیں، فیلڈ مارشل سید عاصم منیر

اس ہیکاتھون کا مقصد پاکستان کے کوانٹم تحقیقاتی نظام کو مضبوط بنانا اور ابھرتی ہوئی ٹیکنالوجیز کو قومی ترقی کی ترجیحات سے جوڑنا ہے۔ پروگرام میں ملک کی ممتاز یونیورسٹیوں کے وائس چانسلرز، اہم سائنسی تحقیقی اداروں کے سربراہان، وزارت خارجہ، وزارت آئی ٹی و ٹیلی کمیونیکیشن، پاکستان اکیڈمی آف سائنسز اور صوبائی حکام بھی شریک ہوں گے۔