وزیر دفاع خواجہ آصف سعودی عرب پہنچ گئے، عالمی ڈیفنس شو میں شرکت کریں گے

پاکستان کے وزیرِ دفاع خواجہ محمد آصف سرکاری دورے پر سعودی عرب پہنچ گئے ہیں، جہاں سعودی حکام نے پرتپاک استقبال کیا ریاض ایئرپورٹ پر سعودی نمائندوں کے ساتھ ساتھ سعودی عرب میں پاکستان کے سفیر احمد فاروق بھی موجود تھے، جنہوں نے وزیرِ دفاع کا خیرمقدم کیا۔

یہ دورہ سعودی حکومت کی باضابطہ دعوت پر کیا جا رہا ہے، جسے دونوں ممالک کے درمیان دفاعی اور سفارتی تعلقات کے تناظر میں اہم قرار دیا جا رہا ہے۔

خواجہ محمد آصف سعودی عرب میں منعقد ہونے والے عالمی سطح کے اہم دفاعی ایونٹ ورلڈ ڈیفنس شو میں پاکستان کی نمائندگی کریں گے۔

یہ بھی پڑھیں :حکومت کی کامیابیوں میں پاک فوج کا بہت بڑا کردار ہے،خواجہ آصف

وزیرِ دفاع ورلڈ ڈیفنس شو کی مختلف سرگرمیوں میں شرکت کریں گے اور جدید دفاعی نظام، اسلحہ اور ٹیکنالوجی پر بریفنگز حاصل کریں گے۔

اس کے علاوہ ایونٹ کے دوران مختلف ممالک کے وزرائے دفاع، عسکری قیادت اور عالمی دفاعی اداروں کے نمائندوں سے ملاقاتیں بھی متوقع ہیں۔

ان ملاقاتوں میں باہمی دفاعی تعاون، عسکری تربیت، ٹیکنالوجی کے تبادلے اور خطے کی سیکیورٹی صورتحال پر تبادلۂ خیال کیا جائے گا

پاکستان اور سعودی عرب کے درمیان دفاعی تعلقات پہلے ہی مضبوط بنیادوں پر قائم ہیں، اور اس دورے سے ان تعلقات کو مزید وسعت ملنے کی توقع ہے۔