مصنوعی ذہانت کے شعبے میں ایک اور بڑی پیش رفت سامنے آئی ہے جہاں امریکی ٹیکنالوجی کمپنی اوپن اے آئی نے پیشہ ورانہ اور پیچیدہ نوعیت کے کاموں کے لیے چیٹ جی پی ٹی کا نیا اور زیادہ طاقتور ماڈل 5.4 متعارف کرا دیا ہے۔ ماہرین کے مطابق اس نئے ورژن کی آمد مصنوعی ذہانت کی دنیا میں ایک اہم سنگ میل سمجھی جا رہی ہے۔
خبر رساں ادارے شنہوا کی رپورٹ کے مطابق کمپنی نے باضابطہ طور پر چیٹ جی پی ٹی 5.4 کی رونمائی کی اور بتایا کہ یہ ماڈل خاص طور پر پیشہ ورانہ استعمال، پیچیدہ تجزیاتی کاموں اور جدید ٹیکنالوجی کے منصوبوں کے لیے تیار کیا گیا ہے۔
کمپنی کے مطابق چیٹ جی پی ٹی 5.4 کو گزشتہ ماڈل 5.3 کوڈکس کی بنیاد پر مزید بہتر بنایا گیا ہے تاکہ کوڈنگ، منطقی تجزیہ اور پیچیدہ ورک فلو کو زیادہ مؤثر انداز میں سنبھالا جا سکے۔ اس نئے ماڈل میں ایسے کئی فیچرز شامل کئے گئے ہیں جو کاروباری اداروں، تحقیقاتی شعبوں اور پیشہ ورانہ ماحول میں کام کرنے والے افراد کے لیے خصوصی طور پر فائدہ مند ثابت ہو سکتے ہیں۔
اوپن اے آئی نے اس کے ساتھ چیٹ جی پی ٹی 5.4 پرو بھی متعارف کرایا ہے جو اس ٹیکنالوجی کا مزید طاقتور ورژن سمجھا جا رہا ہے۔ کمپنی کے مطابق یہ ورژن خاص طور پر بڑے اداروں، سافٹ ویئر ڈویلپرز اور پیچیدہ ڈیجیٹل منصوبوں پر کام کرنے والی ٹیموں کے لیے تیار کیا گیا ہے۔
کمپنی نے بتایا کہ چیٹ جی پی ٹی 5.4 اسپریڈشیٹس، پریزنٹیشنز اور دستاویزات کے ساتھ بہتر انداز میں کام کر سکتا ہے اور صارفین کو اپنے پیشہ ورانہ کام زیادہ تیزی اور درستگی کے ساتھ مکمل کرنے میں مدد دیتا ہے۔ اس ماڈل میں ڈیٹا کو سمجھنے اور اس کا تجزیہ کرنے کی صلاحیت کو بھی نمایاں طور پر بہتر بنایا گیا ہے۔
رپورٹ کے مطابق اس نئے ورژن میں بڑے سیاق و سباق کو سمجھنے کی صلاحیت پہلے کے مقابلے میں کہیں زیادہ بہتر بنائی گئی ہے۔ اس کے علاوہ ویب سرچ کے ساتھ مضبوط انضمام بھی شامل کیا گیا ہے جس کے ذریعے صارفین کو تازہ معلومات تک زیادہ تیزی سے رسائی حاصل ہو سکتی ہے۔
چیٹ جی پی ٹی 5.4 میں شامل تھنکنگ فیچر صارف کو جواب دینے سے پہلے ماڈل کی منطقی سوچ دیکھنے کی سہولت فراہم کرتا ہے۔ اس دوران صارف اپنی ہدایات میں تبدیلی بھی کر سکتا ہے تاکہ مطلوبہ نتائج زیادہ درست طریقے سے حاصل کئے جا سکیں۔
کمپنی کے مطابق اس ماڈل میں اسکرین شاٹس کو سمجھنے کی صلاحیت بھی شامل کی گئی ہے جس کے ذریعے یہ مختلف انٹرفیس عناصر کو پہچان سکتا ہے۔ بعض سافٹ ویئر ماحول میں یہ ماؤس اور کی بورڈ کے ذریعے بنیادی نوعیت کے آپریشنز انجام دینے کی اہلیت بھی رکھتا ہے جس سے خودکار کاموں کی رفتار میں اضافہ ہو سکتا ہے۔
بنچ مارک ٹیسٹ کے نتائج کے مطابق چیٹ جی پی ٹی 5.4 نے اپنے پچھلے ماڈلز کے مقابلے میں نمایاں بہتر کارکردگی دکھائی ہے۔ جی ڈی پی ویل موازنہ ٹیسٹ میں اس نے 83 فیصد کیسز میں صنعتی ماہرین کے برابر یا ان سے بہتر نتائج فراہم کئے جبکہ کوڈنگ کے مختلف امتحانات میں بھی اس نے اپنے پیشرو ماڈلز سے زیادہ اسکور حاصل کئے۔
اوپن اے آئی کا کہنا ہے کہ نئے ماڈل میں معلومات کی درستگی کو مزید بہتر بنایا گیا ہے اور غلط یا گمراہ کن معلومات پیدا ہونے کے امکانات کو پہلے کے مقابلے میں کم کر دیا گیا ہے۔ کمپنی کے مطابق اس ماڈل کو اس طرح ڈیزائن کیا گیا ہے کہ یہ پیچیدہ سوالات اور حقیقی دنیا کے مسائل کو زیادہ بہتر انداز میں سمجھ سکے۔
کمپنی نے بتایا کہ چیٹ جی پی ٹی 5.4 اس وقت پرو، ٹیم اور پلس صارفین کے لیے دستیاب ہے جبکہ ڈویلپرز اسے اے پی آئی کے ذریعے اپنی ایپلی کیشنز میں بھی استعمال کر سکتے ہیں۔ اوپن اے آئی نے یہ بھی اعلان کیا ہے کہ آنے والے مہینوں میں تھنکنگ ورژن کو مرحلہ وار ختم کر دیا جائے گا اور اس کی جگہ مزید جدید فیچرز متعارف کرائے جائیں گے۔
ماہرین ٹیکنالوجی کے مطابق مصنوعی ذہانت کے ایسے جدید ماڈلز مستقبل میں کاروبار، تعلیم، تحقیق اور سافٹ ویئر ڈویلپمنٹ کے شعبوں میں بڑے پیمانے پر تبدیلیاں لا سکتے ہیں اور انسانی کاموں کو زیادہ تیز اور مؤثر بنانے میں اہم کردار ادا کریں گے۔
By 
