By امریکی صدر ڈونلڈ ٹرمپ نے ایران کے ساتھ جاری کشیدگی میں ایک غیر متوقع اور اہم پیش رفت کا اعلان کرتے ہوئے ایرانی توانائی کی تنصیبات پر مجوزہ فوجی حملوں کو مزید 10 روز کے لیے مؤخر کر دیا ہے۔
واشنگٹن میں میڈیا سے گفتگو کرتے ہوئے صدر ٹرمپ نے واضح کیا کہ ان تنصیبات کو نشانہ بنانے کی ڈیڈ لائن اب بڑھا کر 6 اپریل 2026 کر دی گئی ہے، جس کا مقصد سفارتی کوششوں کو ایک اور موقع فراہم کرنا ہے۔
امریکی صدر نے انکشاف کیا کہ یہ اقدام انہوں نے خود ایرانی حکومت کی جانب سے کی جانے والی ایک باقاعدہ درخواست پر کیا ہے۔ صدر ٹرمپ کا کہنا تھا کہ میڈیا میں گردش کرنے والی ‘فیک نیوز’ کے برعکس، امریکہ اور ایران کے درمیان پسِ پردہ بات چیت کا عمل جاری ہے اور تہران نے اس ڈیڈ لائن میں توسیع کی خواہش ظاہر کی تھی تاکہ مذاکرات کے لیے سازگار ماحول پیدا کیا جا سکے۔
انہوں نے مزید کہا کہ وہ صورتحال کا بغور جائزہ لے رہے ہیں اور ان کا مقصد خطے میں ایک پائیدار حل تلاش کرنا ہے، تاہم عسکری آپشن اب بھی میز پر موجود ہے۔
دوسری جانب سفارتی ماہرین صدر ٹرمپ کے اس بیان کو مشرقِ وسطیٰ میں جنگ کے بادل چھٹنے کی ایک موہوم سی امید قرار دے رہے ہیں۔ 6 اپریل تک کی یہ نئی ڈیڈ لائن پاکستان اور ترکیہ جیسے ثالثی کرنے والے ممالک کو مزید وقت فراہم کرے گی کہ وہ تہران کو 15 نکاتی امن فارمولے پر قائل کر سکیں۔
عالمی منڈیوں میں بھی اس اعلان کے بعد تیل کی قیمتوں میں استحکام آنے کی توقع ہے، کیونکہ توانائی کی تنصیبات پر حملے کے خطرے نے عالمی معیشت کو شدید دباؤ میں رکھا ہوا تھا۔ اب تمام تر نظریں 6 اپریل پر لگی ہیں کہ آیا یہ دس روز تزویراتی خاموشی کا پیش خیمہ ثابت ہوتے ہیں یا کسی بڑے فیصلے کی تمہید۔
مزید پڑھیں: ایرانی حملوں کے حیران کن اثرات: خطے میں امریکی فوجی اڈے خالی، اہلکار ہوٹلوں میں منتقل
