عوام کیلئے بری خبر،خام تیل کی قیمتوں میں ریکارڈ اضافہ

مشرقِ وسطیٰ میں بڑھتی ہوئی کشیدگی اور جاری جنگ کے باعث عالمی منڈی میں خام تیل کی قیمتوں میں نمایاں اضافہ ریکارڈ کیا گیا ہے اور قیمتیں 110 ڈالر فی بیرل سے تجاوز کر گئی ہیں۔

بین الاقوامی رپورٹس کے مطابق خطے میں جنگی صورتحال اور آبنائے ہرمز کے حوالے سے پیدا ہونے والی غیر یقینی صورتحال کے باعث عالمی منڈی میں تیل کی سپلائی متاثر ہونے کا خدشہ بڑھ گیا ہے جس کے نتیجے میں قیمتوں میں تیزی دیکھی جا رہی ہے۔

رپورٹ کے مطابق عالمی مارکیٹ میں برینٹ خام تیل کی قیمت میں تقریباً 23 فیصد اضافہ ریکارڈ کیا گیا ہے جس کے بعد یہ بڑھ کر 114.36 ڈالر فی بیرل تک پہنچ گئی ہے جبکہ امریکی خام تیل (ویسٹ ٹیکساس انٹرمیڈیٹ) کی قیمت میں بھی نمایاں اضافہ ہوا ہے اور یہ 27 فیصد اضافے کے بعد 115.11 ڈالر فی بیرل تک جا پہنچی ہے۔

یہ بھی پڑھیں:عرب ممالک سے حملہ ہوا تو محلات کو نشانہ بنائیں گے ،ایران کا انتباہ

معاشی ماہرین کا کہنا ہے کہ مشرقِ وسطیٰ دنیا میں تیل کی سپلائی کا سب سے بڑا خطہ ہے اور عالمی منڈی میں بڑی مقدار میں تیل اسی علاقے سے فراہم کیا جاتا ہے۔ اگر جنگ کے باعث خطے میں تیل کی ترسیل متاثر ہوئی یا آبنائے ہرمز میں آمد و رفت محدود ہوئی تو عالمی منڈی میں قیمتوں میں مزید اضافہ ہو سکتا ہے۔

توانائی کے ماہرین کے مطابق اگر موجودہ جنگ طویل ہو گئی تو خام تیل کی قیمت 150 ڈالر فی بیرل تک پہنچنے کا امکان بھی موجود ہے جس کے اثرات عالمی معیشت اور خصوصاً تیل درآمد کرنے والے ممالک پر واضح طور پر پڑ سکتے ہیں۔