رمضان کی آمد سے قبل روٹی اور نان کی قیمتوں سے متعلق بڑا اعلان

پاکستان نان بائی ایسوسی ایشن نے اعلان کیا ہے کہ 30 رمضان تک روٹی اور نان کی قیمت میں اضافہ نہیں کیا جائے گا۔ ایسوسی ایشن کے مطابق بڑھتے اخراجات کے باوجود عوام کو وقتی سہولت دینے کے لیے فیصلہ کیا گیا ہے کہ روٹی اور نان کی موجودہ قیمتیں 30 رمضان تک برقرار رہیں گی۔

یہ اعلان جنرل کونسل کے اجلاس کے بعد سامنے آیا جس میں راولپنڈی، اٹک، جہلم، چکوال، مری، تلہ گنگ اور ملحقہ علاقوں کے نمائندے شریک ہوئے۔ اجلاس کی صدارت مرکزی صدر شفیق قریشی نے کی۔

ایسوسی ایشن نے بتایا کہ آٹا، گھی، ایل پی جی، بجلی، مزدوری اور تندوروں کے کرایوں میں مسلسل اضافے نے کاروبار کو سخت دباؤ میں ڈال دیا ہے۔ راہنماؤں کے مطابق تجارتی گیس سیلنڈر کی قیمت 16 ہزار روپے تک پہنچ چکی ہے جبکہ دیگر اخراجات بھی روز بروز بڑھ رہے ہیں، جس کے باعث موجودہ نرخ برقرار رکھنا مشکل ہو چکا ہے۔

یہ بھی پڑھیں: بینظیر انکم سپورٹ پروگرام: سوشل پروٹیکشن والٹ اور مفت سم کے حصول سے متعلق اہم خبر

تنظیم نے واضح کیا کہ عید الفطر کے بعد روٹی اور نان کی قیمت میں 5 روپے جبکہ پراٹھا اور روغنی نان 10 روپے مہنگے ہوں گے۔ عہدیداروں نے خبردار کیا کہ اگر خام مال کے نرخ قابو میں نہ آئے تو کئی تندور بند ہونے کا خدشہ ہے۔

اعداد و شمار کے مطابق 79 کلو آٹے کی بوری 7 ہزار 600 روپے سے بڑھ کر 11 ہزار 700 روپے تک جا پہنچی ہے، جبکہ میدے کی بوری 8 ہزار 200 روپے سے بڑھ کر 12 ہزار 600 روپے ہوچکی ہے۔