سونے کی قیمت میں پھر بڑا اضافہ،فی تولہ کتنے کا ہوگیا؟

عالمی اور مقامی گولڈ مارکیٹس میں سونے اور چاندی کی قیمتوں میں نمایاں اضافہ ریکارڈ کیا گیا ہے، جس کے باعث سرمایہ کاروں اور خریداروں پر اس کے اثرات مرتب ہونا شروع ہو گئے ہیں۔

بین الاقوامی منڈی میں سونے کی قیمت میں 39 ڈالر کا اضافہ ہوا ہے، جس کے بعد فی اونس سونا 4532 ڈالر تک پہنچ گیا ہے۔ عالمی مارکیٹ میں سونے کی قیمتوں میں اضافے کے باعث مقامی مارکیٹ میں بھی سونے کی قیمتوں میں نمایاں اضافہ دیکھنے میں آیا ہے۔ فی تولہ سونا 3900 روپے مہنگا ہو کر 4 لاکھ 75 ہزار 962 روپے تک پہنچ گیا، جبکہ 10 گرام سونے کی قیمت 3343 روپے اضافے کے بعد 4 لاکھ 8 ہزار 60 روپے ہو گئی ہے۔

یہ بھی پڑھیں:وزیر اعظم شہباز شریف نے پیٹرولیم مصنوعات پر عوام کو مزید ریلیف دینے کی خوشخبری سنا دی

اسی طرح چاندی کی قیمت میں بھی اضافہ ہوا ہے، جہاں فی تولہ چاندی 70 روپے بڑھ کر 7524 روپے ہو گئی ہے۔ ماہرین کا کہنا ہے کہ عالمی مارکیٹ میں سونے کے نرخ بڑھنے کے اثرات چاندی سمیت دیگر قیمتی دھاتوں پر بھی پڑ رہے ہیں۔

 اگر عالمی معاشی حالات اور جغرافیائی کشیدگی برقرار رہی تو قیمتی دھاتوں کی قیمتوں میں مزید اضافہ ہو سکتا ہے، جس کے باعث مقامی مارکیٹ میں بھی قیمتوں کا دباؤ برقرار رہنے کا امکان ہے۔