لاہور کی اوپن مارکیٹ میں مہنگائی کا دباؤ بدستور برقرار ہے اور کوکنگ آئل اور گھی کی قیمتوں میں ایک بار پھر اضافہ ریکارڈ کیا گیا ہے۔
میڈیا رپورٹ کے مطابق مارکیٹ ذرائع کا بتانا ہے کہ درجہ دوم گھی کی قیمت میں 20 روپے فی کلوگرام اضافہ کیا گیا ہے، اس اضافے کے بعد لاہور کی اوپن مارکیٹ میں درجہ دوم گھی اور کوکنگ آئل کی نئی قیمت 545 روپے فی کلوگرام تک پہنچ گئی ہے۔
قیمتوں میں اچانک اضافے کے باعث گھریلو بجٹ متاثر ہونے لگا ہے اور عام شہریوں کے لیے اخراجات پورے کرنا مزید مشکل ہوتا جا رہا ہے۔
شہریوں کا کہنا ہے کہ گزشتہ کچھ عرصے سے گھی اور کوکنگ آئل کی قیمتوں میں مسلسل اضافہ دیکھنے میں آ رہا ہے جس نے روزمرہ کی ضروری اشیا کی خریداری کو مشکل بنا دیا ہے۔
رمضان المبارک سے پہلے ہی مہنگائی کے باعث کچن کے اخراجات بڑھ چکے ہیں اور اب گھی اور آئل کی قیمتوں میں مزید اضافہ صورتحال کو مزید پیچیدہ بنا رہا ہے۔
دوسری جانب دکانداروں کا کہنا ہے کہ قیمتوں میں اضافے کی بڑی وجہ سپلائی اور لاگت میں اضافہ ہے جس کے اثرات براہ راست مارکیٹ تک پہنچتے ہیں۔
ان کا کہنا ہے کہ جب کمپنیوں یا سپلائرز کی جانب سے قیمتیں بڑھائی جاتی ہیں تو اوپن مارکیٹ میں بھی نئی قیمتیں نافذ ہو جاتی ہیں۔
گھی اور کوکنگ آئل کی قیمتوں میں حالیہ اضافے نے صارفین کی مشکلات میں اضافہ کر دیا ہے اور شہریوں کا مطالبہ ہے کہ قیمتوں کو کنٹرول کرنے کے لیے مؤثر اقدامات کیے جائیں تاکہ عام آدمی کو کچھ ریلیف مل سکے۔
By 
