شہریوں کیلئے بڑی خوشخبری ،رمضان میں سستا آٹا کتنے میں ملے گا ؟قیمت طے ہوگئی، حکومت کا بڑا اعلان

 شہریوں کیلئے بڑی خوشخبری سامنے آگئی ہے۔ رمضان المبارک میں سستا آٹا دستیاب ہوگا، حکومت پنجاب اور پاکستان فلور ملز ایسوسی ایشن کے درمیان جاری ڈیڈلاک ختم ہوگیا ہے اور تمام انتظامات مکمل کر لیے گئے ہیں۔

چند ہفتوں سے جاری مذاکرات کے بعد دونوں فریقین کے درمیان معاملات طے پا گئے، جس کے بعد صوبے بھر میں آٹے کی فراہمی اور قیمتوں سے متعلق واضح لائحہ عمل جاری کر دیا گیا ہے۔

ذرائع کے مطابق حکومت پنجاب اور پاکستان فلور ملز ایسوسی ایشن کے درمیان کئی ادوار کی بات چیت ہوئی، جس میں رمضان المبارک کے دوران عوام کو ریلیف فراہم کرنے پر اتفاق کیا گیا۔ ماضی میں گندم کے کوٹے، سپلائی اور نرخوں کے معاملے پر بعض تحفظات پائے جاتے تھے تاہم حالیہ مذاکرات میں ان تمام امور کو خوش اسلوبی سے حل کر لیا گیا ہے۔

یہ بھی پڑھیں:رمضان میں پاسپورٹ کیسے بنوائیں ،فیس کیا ہوگی؟نئے شیڈول میں سب بتا دیا گیا

ایسوسی ایشن کی جانب سے اعلان کیا گیا ہے کہ پنجاب بھر میں آٹے کی سپلائی معمول کے مطابق جاری رہے گی اور کسی قسم کی قلت پیدا نہیں ہونے دی جائے گی۔ صوبے کے 64 سہولت اور رمضان سہولت بازاروں میں خصوصی کاؤنٹر قائم کیے جائیں گے جہاں 10 کلوگرام آٹے کا تھیلا 850 روپے میں دستیاب ہوگا تاکہ عام آدمی کو براہ راست ریلیف مل سکے۔

اس کے علاوہ فلور ملز ایسوسی ایشن نے صوبہ بھر میں 1550 آٹا سیل پوائنٹس قائم کرنے کا فیصلہ کیا ہے۔ ان سیل پوائنٹس پر 10 کلوگرام آٹے کا تھیلا 905 روپے جبکہ 20 کلوگرام کا تھیلا 1810 روپے میں فروخت کیا جائے گا۔ حکام کے مطابق ان پوائنٹس پر باقاعدہ نگرانی کا نظام بھی وضع کیا جا رہا ہے تاکہ مقررہ نرخوں پر ہی فروخت یقینی بنائی جا سکے۔

یہ بھی پڑھیں:کیا پاکستان اور سعودی عرب میں ایک ہی دن رمضان المبارک کا آغاز ہوگا؟ماہرین فلکیات نے بتا دیا

حکومت کا کہنا ہے کہ رمضان المبارک کے دوران عوام کو ریلیف دینا اولین ترجیح ہے، اسی سلسلے میں انتظامی مشینری کو متحرک کر دیا گیا ہے اور ضلعی سطح پر بھی مانیٹرنگ کمیٹیاں تشکیل دی جا رہی ہیں۔ متعلقہ حکام نے امید ظاہر کی ہے کہ اس اقدام سے نہ صرف مارکیٹ میں استحکام آئے گا بلکہ مصنوعی مہنگائی کا تدارک بھی ممکن ہوگا۔

فلور ملز ایسوسی ایشن کے نمائندگان کا کہنا ہے کہ حکومت کے ساتھ باہمی تعاون کے تحت یہ فیصلہ کیا گیا ہے تاکہ رمضان کے مقدس مہینے میں عوام کو زیادہ سے زیادہ سہولت فراہم کی جا سکے اور آٹے کی بلاتعطل فراہمی یقینی بنائی جائے۔