امریکی حکومت 30 ستمبر 2026 تک 65 ہزار سے زیادہ اضافی’ ایچ ٹو بی‘ سیزنل گیسٹ ورکر ویزے جاری کرے گی۔
یہ بات فیڈرل رجسٹر میں شائع ہونے والے ایک نوٹس میں کہی گئی ہے، جس کے مطابق یہ ویزے اُن آجرین کے لیے دستیاب ہوں گے جنہیں امریکی افرادی قوت کی کمی کے باعث شدید مالی نقصان کا سامنا ہے۔
یہ اقدام’ ایچ ٹو بی‘ ویزوں کی سالانہ حد، جو عام طور پر 66 ہزار ہوتی ہے، کو تقریباً دگنا کر دیتا ہے۔ یہ ویزے زیادہ تر تعمیرات، مہمان نوازی، لینڈ اسکیپنگ، سی فوڈ پروسیسنگ اور دیگر سیزنل صنعتوں میں استعمال ہوتے ہیں، جہاں امریکی آجرین کو کارکن تلاش کرنے میں مشکلات پیش آ رہی ہیں۔
ان شعبوں سے وابستہ کاروباری ادارے طویل عرصے سے لیبر کی قلت کی شکایت کرتے آ رہے ہیں، خاص طور پر مصروف سیزنل ادوار میں۔ ہوٹلوں کے مالکان اور تعمیراتی کمپنیاں ویزوں میں اضافے کا سب سے زیادہ مطالبہ کرنے والوں میں شامل ہیں، جبکہ بعض اداروں نے صدر ڈونلڈ ٹرمپ کی سخت امیگریشن پالیسیوں کے باعث افرادی قوت کی شدید کمی کی شکایت کی ہے۔
یہ فیصلہ صدر ڈونلڈ ٹرمپ کی وسیع تر امیگریشن پالیسی کے پس منظر میں سامنے آیا ہے۔ 2025 میں وائٹ ہاؤس واپسی کے بعد ٹرمپ انتظامیہ نے غیر قانونی امیگریشن کے خلاف سخت کریک ڈاؤن شروع کیا، اور غیر قانونی تارکینِ وطن کو جرائم پیشہ اور اپنی کمیونٹیز پر بوجھ قرار دیا۔ انتظامیہ نے قانونی امیگریشن کے بعض راستوں کو بھی محدود کیا، جن میں وسیع سفری پابندیاں اور پناہ گزینوں و اسائلم کیسز کا سخت جائزہ شامل ہے۔
اس کے باوجود، ٹرمپ انتظامیہ اور اس سے قبل ڈیموکریٹ صدر جو بائیڈن کی حکومت نے لیبر مارکیٹ کے دباؤ کے دوران’ ایچ ٹو بی‘ پروگرام میں توسیع کی ہے۔ ٹرمپ کے 2017 سے 2021 کے پہلے صدارتی دور میں بھی اسی نوعیت کے اقدامات کیے گئے تھے۔
تاہم، اس توسیع کی مخالفت بھی کی جا رہی ہے۔ کم امیگریشن کی حامی تنظیموں کا کہنا ہے کہ’ ایچ ٹو بی‘ ویزے امریکی کارکنوں کی اجرت اور روزگار کے مواقع کو متاثر کرتے ہیں۔
دوسری جانب، ٹرمپ انتظامیہ نے ہائی اسکلڈ امیگریشن پر سخت مؤقف اختیار کیا ہے۔’ایچ ون بی‘ ویزا پروگرام کے تحت غیر ملکی کارکن رکھنے والی ٹیک کمپنیوں پر 1 لاکھ ڈالر کی اضافی فیس عائد کی گئی ہے، جس کے خلاف قانونی چیلنج بھی دائر کیا گیا ہے۔
نوٹس کے مطابق اضافی’ ایچ ٹو بی‘ ویزوں کی اجازت دینے والا عارضی قاعدہ منگل کے روز باضابطہ طور پر فیڈرل رجسٹر میں شائع کیا جائے گا، جس کے بعد آجرین توسیع شدہ ویزہ کوٹے کے لیے درخواست دے سکیں گے۔
By 
