وزیر اعظم کی خود کش دھماکہ کی مزمت، لواحقین سے تعزیت،تحقیقات کا حکم

وزیر اعظم شہباز شریف نے راولپنڈی میں مسجد میں ہونے والے خودکش دھماکے کی شدید الفاظ میں مذمت کی ہے اور واقعے پر گہرے دکھ اور افسوس کا اظہار کیا ہے۔ وزیر اعظم نے شہداء کے لواحقین سے ہمدردی اور زخمیوں کی جلد صحت یابی کے لیے دعا بھی کی ہے۔

وزیر اعظم نے وفاقی وزیر صحت کو ہدایت کی ہے کہ دھماکے میں زخمی ہونے والے تمام افراد کو بہترین اور بروقت طبی سہولتوں کی فراہمی ہر صورت یقینی بنائی جائے۔ انہوں نے واضح کیا کہ زخمیوں کے علاج معالجے میں کسی قسم کی کوتاہی برداشت نہیں کی جائے گی اور حکومت تمام دستیاب وسائل بروئے کار لائے گی۔

یہ بھی پڑھیں:اسلام آباد بم دھماکا، پمز، پولی کلینک اور سی ڈی اے ہسپتال الرٹ، تمام اہم وارڈز فعال

 وزیر اعظم نے وفاقی وزیر داخلہ کو واقعے کی مکمل اور شفاف تحقیقات کا حکم دیا ہے۔ وزیر اعظم نے ہدایت کی کہ حملے کے ذمہ داروں اور ان کے سہولت کاروں کو جلد از جلد قانون کے کٹہرے میں لایا جائے۔

دوسری جانب وفاقی وزیر داخلہ نے وزیر اعظم شہباز شریف سے ملاقات کی اور انہیں واقعے کی ابتدائی تفصیلات سے آگاہ کیا۔ ملاقات کے دوران وزیر داخلہ نے سیکیورٹی صورتحال، پولیس اور سیکیورٹی اداروں کی کارروائیوں اور ابتدائی تفتیش سے متعلق بریفنگ دی۔

وزیر اعظم نے سیکیورٹی اداروں کی کارروائیوں پر اطمینان کا اظہار کرتے ہوئے کہا کہ عبادت گاہوں کو نشانہ بنانے والے عناصر انسانیت اور اسلام کے دشمن ہیں، اور ریاست ان کے خلاف پوری قوت سے کارروائی جاری رکھے گی۔