موٹر سائیکل سواروں کے لیے خوشخبری،ماہانہ 20 لیٹر سبسڈی پٹرول ملے گا،ایپ تیار کر لی گئی

حکومت نے توانائی کے بڑھتے ہوئے بحران سے نمٹنے کے لیے پٹرول پر سبسڈی کی فراہمی کو ڈیجیٹل بنانے کا فیصلہ کر لیا ہے، جس کے تحت ایک موبائل ایپ کے ذریعے مستحق صارفین تک سبسڈی پہنچائی جائے گی اور پٹرول کی تقسیم کو جدید نظام کے تحت منظم کیا جائے گا۔

اس منصوبے کے لیے وزارت آئی ٹی نے 24 ہزار موبائل فونز کی خریداری کے لیے اظہارِ دلچسپی طلب کر لیا ہے، جبکہ نیشنل آئی ٹی بورڈ ان ڈیوائسز کی قیمتوں کا تعین کرے گا۔

 آئل مارکیٹنگ کمپنیاں یہ موبائل فونز خرید کر ملک بھر کے پٹرول پمپس کو فراہم کریں گی۔ تقریباً 12 ہزار پٹرول پمپس پر مجموعی طور پر 24 ہزار موبائل فونز دیے جائیں گے، اور ہر پمپ پر دو نوزلز سبسڈی والے پٹرول کے لیے مخصوص ہوں گی۔

یہ بھی پڑھیں:ایران کے اسرائیل پر داغے گئے میزائلوں پر پاکستانیوں سے متعلق اہم تحریر لکھ دی، ویڈیو جاری

اس نظام کے تحت خاص طور پر موٹر سائیکل اور رکشہ (ٹو اور تھری وہیلرز) استعمال کرنے والوں کو موبائل ایپ کے ذریعے سبسڈائز پٹرول فراہم کیا جائے گا۔ صارفین کو ایپ کے ذریعے ڈیجیٹل واؤچرز جاری کیے جائیں گے اور انہیں مقررہ حد سے زیادہ پٹرول لینے کی اجازت نہیں ہوگی۔

ابتدائی تجویز کے مطابق موٹر سائیکل سواروں کو ماہانہ 20 لیٹر تک سبسڈی والا پٹرول فراہم کیا جائے گا، جبکہ 800 سی سی تک کی گاڑیوں کو اس اسکیم میں شامل کرنے کے حوالے سے ابھی حتمی فیصلہ نہیں کیا گیا۔