وزیر اعظم سعودی ولی عہد کی دعوت پر سعودی عرب کے سرکاری دورے پر پہنچ گئے

وزیراعظم محمد شہباز شریف سعودی عرب کے ولی عہد و وزیر اعظم شہزادہ محمد بن سلمان آل سعود کی دعوت پر سعودی عرب کے سرکاری دورے پر جدہ پہنچ گئے ہیں۔

وزیراعظم محمد شہباز شریف سعودی عرب میں چند گھنٹے قیام کریں گے اور سعودی عرب کے ولی عہد و وزیراعظم شہزادہ محمد بن سلمان آل سعود سے ملاقات کے بعد وطن واپس روانہ ہو جائیں گے۔

جدہ کے بین الاقوامی ہوائی اڈے کے رائل ٹرمینل پر مکہ ریجن کے ڈپٹی گورنر پرنس سعود بن مشعل بن عبدالعزیز، ریاض میں تعینات پاکستان کے سفیر احمد فاروق، جدہ میں تعینات پاکستان کے قونصل جنرل سید مصطفیٰ ربانی اور دیگر سفارتی عملے نے وزیراعظم کا استقبال کیا۔

وزیراعظم شہباز شریف اور سعودی ولی عہد شہزادہ محمد بن سلمان کے درمیان ملاقات میں خطے کی موجودہ صورتحال، علاقائی سلامتی کی صورتحال اور دوطرفہ تعلقات پر تفصیلی بات چیت ہوگی۔

یہ بھی پڑھیں: پاکستان کے لیے نئی معاشی آزمائش، ’آئی ایم ایف‘ سے معاہدہ طے نہ ہوسکا، مذاکرات جاری رکھنے پراتفاق

حکومتی ذرائع کے مطابق اس دورے سے سفارتی میدان میں پاکستان کا مثبت کردار واضح ہو رہا ہے اور پاکستان آئندہ بھی یہ کردار ادا کرتا رہے گا۔