صدر آصف علی زرداری کی طرف سے پیٹرولیم کی قیمتوں سے متعلق خصوصی ہدایات جاری

آصف علی زرداری نے حکومت کو ہدایت کی ہے کہ معاشی پالیسیوں کی تشکیل میں عوامی ریلیف کو اولین ترجیح دی جائے تاکہ عام شہریوں کو مہنگائی کے دباؤ سے زیادہ سے زیادہ تحفظ فراہم کیا جا سکے۔

ایوانِ صدر میں ہونے والی ایک اہم ملاقات میں صدر مملکت سے محسن نقوی، محمد اورنگزیب اور دیگر وفاقی وزرا نے ملاقات کی۔ ملاقات کے دوران ملک میں امن و امان کی مجموعی صورتحال اور موجودہ معاشی حالات پر تفصیلی تبادلہ خیال کیا گیا۔ شرکا نے داخلی سلامتی کے امور اور اقتصادی استحکام کے لیے جاری اقدامات پر صدر کو بریفنگ دی۔

صدر آصف علی زرداری نے اس موقع پر زور دیا کہ حکومت ایسے عملی اقدامات کرے جن سے براہِ راست عام آدمی کو فائدہ پہنچے۔ انہوں نے کہا کہ پیٹرولیم مصنوعات کی قیمتوں کے تعین میں عوامی مفاد کو مدنظر رکھا جائے اور قیمتوں کے بوجھ کو حتی الامکان کم رکھا جائے تاکہ شہریوں کو ریلیف مل سکے۔

یہ بھی پڑھیں:عمران خان کی اہلیہ بشری بی بی کو عدالت سے بڑا ریلیف مل گیا

صدر مملکت کا کہنا تھا کہ مہنگائی کے اثرات کم کرنا حکومت کی اولین ذمہ داری ہے اور پالیسی سازی میں غریب اور متوسط طبقے کو خصوصی توجہ دی جانی چاہیے۔ انہوں نے اس عزم کا اظہار کیا کہ ریاستی وسائل کا بہتر استعمال کرتے ہوئے عوام کو زیادہ سے زیادہ سہولت فراہم کی جائے گی۔