پٹرولیم مصنوعات کی قیمتوں سے متعلق عوام کے لئے بڑی خوشخبری

وزیر اعظم شہباز شریف نے عالمی منڈی میں تیل کی قیمتوں میں اضافے کے باوجود پیٹرولیم مصنوعات کی قیمتوں میں اضافہ نہ کرنے کا اعلان کرتے ہوئے کہا ہے کہ حکومت عام شہریوں پر بوجھ کم کرنے کے عزم کے تحت یہ فیصلہ کر رہی ہے۔

وزیر اعظم کے مطابق پیٹرول کی قیمت 321.17 روپے فی لیٹر جبکہ ڈیزل کی قیمت 335.86 روپے فی لیٹر برقرار رہے گی اور یہ قیمتیں آئندہ ہفتے ہونے والے پیٹرولیم قیمتوں کے جائزے تک برقرار رہیں گی۔

انہوں نے کہا کہ یہ فیصلہ عوام سے کیے گئے وعدے کے مطابق کیا گیا ہے اور اس کا مقصد موجودہ مشکل معاشی حالات میں عوام کو ریلیف فراہم کرنا ہے۔

وزیر اعظم شہباز شریف نے کہا کہ “جہاں بھی ممکن ہوگا ہم ان مشکل حالات میں بھی عوام کو ریلیف فراہم کرتے رہیں گے۔” انہوں نے کہا کہ خطے میں بڑھتی ہوئی جیوپولیٹیکل کشیدگی عالمی معیشت پر دباؤ ڈال رہی ہے اور اس کے پاکستان پر بھی اہم اثرات مرتب ہو سکتے ہیں۔

انہوں نے مزید کہا کہ حکومت بروقت پالیسی فیصلوں، کفایت شعاری کے اقدامات اور مالی نظم و ضبط کے ذریعے صورتحال کو سنبھالنے کی کوشش کر رہی ہے۔

وزیر اعظم نے مزید کہا کہ ایک عوامی نمائندے کے طور پر وہ کم آمدنی والے طبقات پر بوجھ کم کرنے کے لیے پرعزم ہیں اور اس کا آغاز حکومت اور ملک کے اشرافیہ طبقے کے اندر اخراجات کم کرنے سے کیا جا رہا ہے۔

یہ بھی پڑھیں: پٹرول وڈیزل آج مہنگا ہوگا یا سستا ، وزیر اعظم منظوری دیں گے

ان کا کہنا تھا کہ صوبائی حکومتیں بھی وفاقی حکومت کے کفایت شعاری کے اقدامات میں تعاون کر رہی ہیں جو ایک حوصلہ افزا پیش رفت ہے۔

وزیر اعظم کے مطابق پاکستان کے پاس اس وقت ملک کی ضروریات پوری کرنے کے لیے خام تیل کے وافر ذخائر موجود ہیں، جو ملک کی سفارتی اور معاشی ٹیموں کی کوششوں کا نتیجہ ہیں۔

انہوں نے مزید کہا کہ وفاقی اور صوبائی حکام اس بات کو یقینی بنانے کے لیے مل کر کام کر رہے ہیں کہ کوئی بھی ریٹیلر حکومت کی جانب سے مقرر کردہ قیمتوں سے زیادہ نرخ وصول نہ کرے۔

وزیر اعظم شہباز شریف نے امید ظاہر کی کہ عالمی حالات میں بہتری آئے گی اور بین الاقوامی پیٹرولیم مارکیٹ میں استحکام واپس آئے گا۔