آئی سی سی مینز ٹی ٹوئنٹی ورلڈ کپ 2026 کا سب سے زیادہ انتظار کیا جانے والا اور ہائی وولٹیج مقابلہ، پاکستان اور بھارت کے درمیان ٹاکرا، بارش کے باعث متاثر ہونے کے خدشات پیدا ہو گئے ہیں۔ کرکٹ شائقین کی نظریں اس بڑے مقابلے پر جمی ہوئی ہیں، تاہم موسم کی غیر یقینی صورتحال نے میچ کے انعقاد پر سوالیہ نشان لگا دیا ہے۔
ٹی ٹوئنٹی ورلڈ کپ کے گروپ اے میں شامل پاکستان اور بھارت کے درمیان یہ اہم میچ 15 فروری بروز اتوار سری لنکا کے شہر کولمبو میں شیڈول ہے۔ دونوں روایتی حریفوں کے درمیان مقابلہ ہمیشہ عالمی سطح پر غیر معمولی توجہ حاصل کرتا ہے، لیکن اس بار ممکنہ بارش نے اس میچ کی اہمیت کے ساتھ ساتھ شائقین کی تشویش میں بھی اضافہ کر دیا ہے۔
اتوار کو شیڈول پاک بھارت میچ ایک مرتبہ پھر غیر یقینی صورتحال سے دوچار ہو گیا ہے، کیونکہ کولمبو میں متوقع خراب موسم کے باعث میچ کے متاثر ہونے کا امکان ظاہر کیا جا رہا ہے۔ محکمہ موسمیات کی مختلف رپورٹس کے مطابق میچ کے دن بارش اور گرج چمک کے ساتھ طوفانی صورتحال پیدا ہونے کا امکان تقریباً 50 فیصد ہے۔
محکمہ موسمیات کے ماہرین کا کہنا ہے کہ خاص طور پر شام کے اوقات میں بارش کے امکانات زیادہ ہیں، جبکہ شام 6 بجے کے قریب شہر میں تقریباً 2.1 ملی میٹر بارش متوقع ہے، جو کھیل کے تسلسل میں رکاوٹ بن سکتی ہے۔
اگر بارش کے باعث میچ مکمل طور پر منسوخ ہو جاتا ہے تو آئی سی سی کے قوانین کے مطابق پاکستان اور بھارت دونوں ٹیموں کو ایک، ایک پوائنٹ دے دیا جائے گا۔ ایسی صورت میں شائقین کرکٹ اس سنسنی خیز مقابلے سے محروم رہ جائیں گے، جس کا انہیں طویل عرصے سے انتظار ہے۔ یہی وجہ ہے کہ دونوں ممالک کے کرکٹ فینز اس وقت دعاگو ہیں کہ موسم صاف رہے اور یہ بڑا میچ بغیر کسی رکاوٹ کے مکمل ہو سکے۔
واضح رہے کہ پاکستان ٹیم اس وقت ٹی ٹوئنٹی ورلڈ کپ میں شاندار کارکردگی کا مظاہرہ کر رہی ہے۔ قومی ٹیم اپنے دونوں ابتدائی میچز جیت کر گروپ اے میں 4 پوائنٹس کے ساتھ پہلے نمبر پر موجود ہے۔ پاکستان کی کوشش ہوگی کہ وہ بھارت کے خلاف بھی فتح حاصل کر کے اپنی پوزیشن مزید مضبوط کرے، تاہم موسم کی صورتحال اس اہم مقابلے کے لیے ایک بڑا چیلنج بن کر سامنے آ رہی ہے۔
دوسری جانب بھارت کے لیے بھی یہ میچ نہایت اہمیت کا حامل ہے، کیونکہ گروپ کی پوزیشن بہتر بنانے کے لیے اسے اس مقابلے میں کامیابی درکار ہے۔ ایسے میں بارش کا خطرہ دونوں ٹیموں کے لیے تشویش کا باعث بنا ہوا ہے اور تمام نظریں موسم کی صورتحال پر مرکوز ہیں۔
By 
