حکومت نے پیٹرولیم مصنوعات کی قیمتوں میں ممکنہ اضافہ روکنے کے لیے بڑا قدم اٹھا لیا

وفاقی حکومت نے عوام کو مہنگائی کے مزید دباؤ سے بچانے کے لیے اہم فیصلہ کرتے ہوئے پیٹرولیم مصنوعات کی قیمتیں بڑھانے کے بجائے ترقیاتی بجٹ میں نمایاں کٹوتی کرنے کی حکمتِ عملی اختیار کر لی ہے۔

نجی ٹی وی کے مطابق شہباز شریف کی قیادت میں حکومت نے جاری مالی سال کے ترقیاتی اخراجات میں 100 ارب روپے کمی کی تجویز تیار کر لی ہے۔حکومتی حلقوں کا کہنا ہے کہ اس فیصلے کا مقصد پیٹرول اور ڈیزل کی قیمتوں میں ممکنہ بڑے اضافے کو روکنا ہے۔

قبل ازیں یہ غور کیا جا رہا تھا کہ پیٹرول کی قیمت میں تقریباً 55 روپے فی لیٹر اور ڈیزل میں 75 روپے فی لیٹر تک اضافہ کیا جائے، تاہم اب اس تجویز کو مؤخر کرتے ہوئے متبادل راستہ اختیار کیا گیا ہے۔

ذرائع کے مطابق ترقیاتی بجٹ جو اس وقت تقریباً 1000 ارب روپے ہے، اسے کم کر کے 900 ارب روپے تک لانے پر غور کیا جا رہا ہے،اس کے ساتھ ساتھ تمام جاری ترقیاتی منصوبوں کے فنڈز میں اوسطاً 10 فیصد تک کمی کی جائے گی تاکہ مالی وسائل کو بہتر انداز میں استعمال کیا جا سکے۔

یہ بھی پڑھیں :پیٹرول پمپس مالکان کی بڑی دھمکی! ملک بھر میں فیول بحران کا خدشہ

حکومت کا مؤقف ہے کہ اس اقدام سے ایک جانب عوام کو فوری ریلیف ملے گا اور دوسری طرف مالیاتی خسارے کو بھی قابو میں رکھنے میں مدد ملے گی،بچائے گئے 100 ارب روپے کو ہنگامی ریلیف اقدامات اور عوامی فلاح و بہبود کے منصوبوں پر خرچ کرنے کی تجویز دی گئی ہے، تاکہ معاشی دباؤ کا اثر کم سے کم کیا جا سکے۔

یہ فیصلہ قلیل مدتی طور پر عوام کے لیے فائدہ مند ثابت ہو سکتا ہے، کیونکہ پیٹرولیم مصنوعات کی قیمتوں میں اضافہ براہِ راست مہنگائی میں اضافے کا سبب بنتا ہےتاہم طویل مدتی بنیادوں پر ترقیاتی منصوبوں میں کٹوتی کے اثرات بھی سامنے آ سکتے ہیں، جن میں بنیادی ڈھانچے کی رفتار سست ہونے کا خدشہ شامل ہے،حکومت مہنگائی پر قابو پانے اور عوامی دباؤ کم کرنے کے لیے فوری نوعیت کے فیصلے کر رہی ہے، جبکہ مالیاتی توازن برقرار رکھنے کی کوشش بھی جاری ہے۔