آئی سی سی مینز ٹی ٹوئنٹی ورلڈ کپ میں پاکستان کی جانب سے بھارت کے خلاف میچ کھیلنے سے انکار کے بعد بھارتی کرکٹ ٹیم کے کپتان سوریہ کمار یادیو نے اپنا ردعمل ظاہر کیا ہے۔
غیر ملکی میڈیا رپورٹس کے مطابق سوریہ کمار یادیو نے ممبئی میں آئی سی سی ٹی ٹوئنٹی ورلڈ کپ سے قبل ٹیموں کے کپتانوں کی میڈیا بریفنگ کے دوران کہا کہ پاکستان کے بائیکاٹ کے باوجود بھارتی ٹیم گروپ اسٹیج میں پاکستان کے خلاف میچ کھیلنے کے لیے مکمل طور پر تیار ہے۔
انہوں نے واضح کیا کہ پاکستان سے میچ ہو یا نہ ہو، بھارتی ٹیم کولمبو ضرور جائے گی۔ انہوں نے کہا کہ بھارتی ٹیم نے پاکستان کے ساتھ کھیلنے سے انکار نہیں کیا، بلکہ یہ فیصلہ پاکستان کی جانب سے کیا گیا۔
سوریہ کمار یادیو نے بتایا کہ انٹرنیشنل کرکٹ کونسل نے شیڈول بنایا اور بی سی سی آئی و بھارتی حکومت نے آئی سی سی کے ساتھ مشاورت کے بعد نیوٹرل وینیو پر کھیلنے کا فیصلہ کیا ہے۔ انہوں نے کہا کہ کولمبو کے لیے فلائٹ بک ہے اور ہم وہاں جا رہے ہیں، آگے کیا ہوتا ہے یہ بعد میں دیکھا جائے گا۔
پاکستان کے خلاف میچ کے حوالے سے ٹیم کے ماحول پر بات کرتے ہوئے انہوں نے کہا کہ منصوبہ بندی بالکل واضح ہے: پہلے 7 فروری کو میچ، پھر 12 فروری کو نمیبیا سے اور اس کے بعد کولمبو روانگی۔
بھارتی کپتان نے موجودہ صورتحال پر کہا کہ یہ فیصلہ میرے اختیار میں نہیں ہے، اگر ہمیں 15 فروری کو پاکستان کے خلاف کھیلنے کا کہا گیا تو ہم ضرور کھیلیں گے۔
واضح رہے کہ بنگلہ دیش کو ورلڈ کپ سے نکالنے کے بعد پاکستان نے میگا ایونٹ میں شرکت کا اعلان تو کیا ہے، تاہم احتجاجاً 15 فروری کو بھارت کے خلاف میچ کا بائیکاٹ کرنے کا اعلان کیا ہے۔
وزیراعظم پاکستان محمد شہباز شریف نے بدھ کے روز ایک بار پھر اس موقف کی توثیق کی، جبکہ قومی ٹیم کے کپتان سلمان علی آغا نے کہا کہ حکومتی ہدایات پر من و عن عمل کیا جائے گا۔
By 
