خیبر پختونخواحکومت کی طرف سے سب سے بڑے ڈیجیٹل نیوز پلیٹ فارم پختون ڈیجیٹل کو دبائو کا سامنا

خیبر پختونخوا کے سب سے بڑے ڈیجیٹل نیوز چینل پختون ڈیجیٹل کو حکومت کی طرف سے دبائو کا سامنا ،پختون ڈیجیٹل کے ایڈیٹر کاشف الدین سید نے گفتگو کرتے ہوئے واضح کیا ہے کہ ان کا ادارہ آزادیٔ اظہارِ رائے اور صحافتی اصولوں پر کسی قسم کا سمجھوتہ نہیں کرے گا۔

ان کا یہ بیان ایک ایسے وقت میں سامنے آیا ہے جب وزیراعلیٰ خیبر پختونخوا محمد سہیل آفریدی کے بھائی عامر آفریدی کی جانب سے پختون ڈیجیٹل کے خلاف پانچ کروڑ روپے ہرجانے کا قانونی نوٹس بھیجا گیا ہے،تفصیلات کے مطابق یہ نوٹس پختون ڈیجیٹل کی جانب سے شائع کی گئی خبروں کے ردعمل میں بھیجا گیا، جس پر ادارے کی جانب سے سخت مؤقف اختیار کیا گیا ہے۔

کاشف الدین سید کا کہنا ہے کہ پختون ڈیجیٹل نے جو بھی خبریں شائع کی ہیں وہ مستند صحافیوں کے بیانات، ٹویٹس اور ویڈیو کلپس کی بنیاد پر رپورٹ کی گئی ہیں، اور ان کا مقصد صرف عوام کے سامنے حقائق لانا ہے، انہوں نے کہا کہ عوامی مفاد میں معلومات فراہم کرنا صحافت کی بنیادی ذمہ داری ہے، جس سے کسی صورت پیچھے نہیں ہٹا جا سکتا۔

دوسری جانب عامر آفریدی کی جانب سے بھیجے گئے قانونی نوٹس میں اس بات پر اعتراض اٹھایا گیا ہے کہ سینئر صحافیوں کے ٹویٹس، تجزیے اور تبصرے ادارے کے پلیٹ فارم سے کیوں نشر کیے جا رہے ہیں۔ نوٹس میں اس عمل کو غیر مناسب قرار دیتے ہوئے ادارے سے وضاحت طلب کی گئی ہے۔

تاہم کاشف الدین سید نے اپنے مؤقف کو دہراتے ہوئے کہا کہ پختون ڈیجیٹل ہر قسم کے دباؤ کے باوجود سچ اور حق کی آواز بلند کرتا رہے گا۔ انہوں نے اس عزم کا اظہار بھی کیا کہ ادارہ کسی بھی قانونی چیلنج کا سامنا کرنے کے لیے مکمل طور پر تیار ہے اور صحافتی اصولوں پر قائم رہے گا۔