لاہور سمیت پنجاب کے مختلف شہروں میں فضائی آلودگی برقرار

صوبائی دارالحکومت لاہور سمیت پنجاب کے مختلف شہروں میں فضائی آلودگی بدستور برقرار ہے۔

ماحولیاتی ویب سائٹ کے مطابق آلودہ ترین شہروں میں لاہورآج بھی  پہلےنمبر پر ہے، شہر کا مجموعی ائیر کوالٹی انڈیکس 331 ریکارڈ کیا گیا۔

پنجاب کے دیگر شہروں کی فضا بھی انتہائی مضر صحت ہے جہاں  قصور میں اے کیو آئی 327 اور  نارووال میں 313  تک پہنچ  گیا جبکہ   شیخوپورہ میں  پارٹیکولیٹ میٹرز کی تعداد 292 ریکارڈ کی گئی۔

یہ بھی پڑھیں : پنجاب : سموگ میں خطرناک اضافہ، مختلف شہروں کی فضا انتہائی مضر صحت قرار

عالمی ماحولیاتی ویب سائٹ کے مطابق دنیا کے بڑے شہروں میں فضائی آلودگی کے اعتبار سے لاہور کا چھٹا اور کراچی کا 14 واں نمبر ہے۔

ماہرین کا کہنا ہے کہ سموگ کی بنیادی وجوہات میں صنعتی اخراج، ٹریفک کا دھواں، فصلوں کی باقیات جلانا اور موسمی تبدیلیاں شامل ہیں،  اگر فوری طور پر اقدامات نہ کیے گئے تو فضا میں آلودگی کی یہ سطح شہریوں کے لیے سانس، دل اور آنکھوں کی بیماریوں میں خطرناک اضافہ کر سکتی ہے۔

طبی ماہرین کے مطابق بڑھتی ہوئی آلودگی شہریوں کے لیے صحت عامہ کا بحران بن چکی ہے ، ماہرین نے شہریوں کو غیر ضروری سفر سے گریز کرنےاور ماسک کا استعمال لازمی قراردیا ہے جبکہ صبح کے وقت کھلی فضا میں ورزش یا دیگر سرگرمیوں سے پرہیز کرنے کی ہدایت کی ہے تاکہ سانس اور دل کے امراض سے بچاؤ ممکن ہو سکے۔

یہ بھی پڑھیں : بھارت سے آنیوالی مضرِ صحت ہواؤں سے فضائی آلودگی میں اضافہ، لاہور سرفہرست

واضح رہے کہ پنجاب ڈیزاسٹر مینجمنٹ اتھارٹی (پی ڈی ایم اے) نے صوبے بھر میں سموگ کے بڑھتے خطرات کے پیشِ نظر الرٹ جاری کر رکھا ہے ، ڈائریکٹر جنرل پی ڈی ایم اے عرفان علی کاٹھیا کے مطابق محکمہ موسمیات کی پیشگوئی کے مطابق نومبر سے وسط دسمبر تک سموگ کی شدت میں اضافے کا امکان ہے جس کے باعث عوام کو احتیاطی تدابیر اختیار کرنے کی ضرورت ہے۔