پاسپورٹ بنوانے والوں کے لئے بڑی خبر

پاسپورٹ بنوانے والے شہریوں کے لیے سہولت فراہم کرنے کے حوالے سے اہم پیش رفت سامنے آئی ہے۔ خیبر پختونخوا میں پاسپورٹ خدمات کو مزید بہتر بنانے اور زیادہ علاقوں تک پہنچانے کے مقصد سے ڈائریکٹوریٹ جنرل آف پاسپورٹس نے صوبے کے کئی کم سہولت یافتہ علاقوں میں نئے کاؤنٹرز قائم کرنے کے منصوبے پر عمل درآمد شروع کر دیا ہے۔

اسلام آباد میں گورنر خیبر پختونخوا فیصل کریم کنڈی نے ڈائریکٹر جنرل پاسپورٹس مصطفیٰ جمال قاضی سے ملاقات کی اور نئے پاسپورٹ سہولتوں کا تفصیلی جائزہ لیا۔ ملاقات کے دوران ڈائریکٹر جنرل نے بتایا کہ جلد ہی پاہارپور، پنیالہ اور درگئی میں نئے پاسپورٹ کاؤنٹرز قائم کیے جائیں گے۔ اس کے علاوہ انتظامی اقدامات اور سہولتوں کی تیاری کے بارے میں بھی گورنر کو تفصیل سے آگاہ کیا گیا۔

گورنر فیصل کریم کنڈی نے کہا کہ نئے کاؤنٹرز کی بدولت عوام اپنے گھر کے قریب پاسپورٹ خدمات حاصل کر سکیں گے، جس سے طویل سفر کے اخراجات اور مشکلات میں واضح کمی آئے گی۔ یہ سہولت خاص طور پر ان افراد کے لیے مفید ہوگی جو دور دراز علاقوں میں رہائش پذیر ہیں۔

یہ بھی پڑھیں: نادرا نے شہریوں کےلئے نئی سہولت متعارف کرادی

انہوں نے مزید کہا کہ ان سہولتوں سے نہ صرف عام شہری بلکہ عمرہ، بیرون ملک ملازمت یا ذاتی وجوہات کے لیے سفر کرنے والے افراد بھی مستفید ہوں گے۔

ملاقات کے اختتام پر دونوں فریقین نے اتفاق کیا کہ جیسے ہی نئے کاؤنٹرز عوام کے لیے مکمل طور پر تیار ہوں گے، گورنر فیصل کریم کنڈی ان کا باقاعدہ افتتاح کریں گے۔

یہ اقدام صوبے میں پاسپورٹ خدمات کی رسائی کو بہتر بنانے اور شہریوں کے لیے سہولتیں فراہم کرنے کی سمت ایک اہم پیش رفت قرار دیا جا رہا ہے۔