اسلام آباد اور پنجاب میں اعلیٰ سطح کے تقرر و تبادلوں کے سلسلے میں وفاقی اور صوبائی حکومت نے متعدد انتظامی افسران کے عہدوں میں تبدیلی کی منظوری دیتے ہوئے باقاعدہ نوٹیفیکیشن جاری کر دیے ہیں۔
سرکاری نوٹیفیکیشن کے مطابق گریڈ 21 کے سینئر افسر سلطان احمد چوہدری کو انسپکٹر جنرل موٹروے پولیس تعینات کر دیا گیا ہے۔ ان کی تعیناتی کا نوٹیفیکیشن وزارتِ داخلہ کی جانب سے جاری ہوا، جس کے بعد وہ باضابطہ طور پر اپنے نئے عہدے کا چارج سنبھالیں گے۔
پنجاب میں انتظامی عہدوں پر بھی تبدیلیاں کی گئی ہیں۔ جاری نوٹیفیکیشن کے مطابق اسسٹنٹ کمشنر جنرل لاہور عبدالسلام عارف کو ان کے عہدے سے ہٹا کر محکمہ سروسز و جنرل ایڈمنسٹریشن ڈیپارٹمنٹ رپورٹ کرنے کی ہدایت کی گئی ہے۔ ان کی جگہ وجیہہ ثمرین کو اسسٹنٹ کمشنر جنرل لاہور تعینات کیا گیا ہے، جنہیں فوری طور پر چارج سنبھالنے کی ہدایت کی گئی ہے۔
اسی طرح راولپنڈی میں بھی اہم تبدیلیاں سامنے آئی ہیں۔ نوٹیفیکیشن کے مطابق اسسٹنٹ کمشنر ریونیو راولپنڈی آفاق چوہدری کو تبدیل کر کے جنرل اسسٹنٹ ریونیو راولپنڈی تعینات کر دیا گیا ہے۔ ان کے تقرر کے بعد محمد سعید نواز کو نیا اسسٹنٹ کمشنر ریونیو راولپنڈی مقرر کیا گیا ہے۔
سرکاری اعلامیے میں واضح کیا گیا ہے کہ تمام افسران کو ہدایت کی گئی ہے کہ وہ فوری طور پر اپنے نئے عہدوں کا چارج سنبھالیں تاکہ انتظامی امور میں تسلسل برقرار رہے۔ ان تقرریوں کا مقصد مختلف محکموں کی کارکردگی بہتر بنانا اور خدمات کی مؤثر فراہمی کو یقینی بنانا ہے۔
By 
