سری لنکا میں تباہی مچانے کے بعد سمندری طوفان دتوا اب بھارت کی طرف بڑھ رہا ہے اور آج بھارتی ساحلی علاقوں سے ٹکرانے کا امکان ہے۔
میڈیا رپورٹس کے مطابق طوفان کے زیر اثر بھارتی ریاست تامل ناڈو کے ساحلی علاقوں میں شدید بارشیں ہو رہی ہیں، جس کے نتیجے میں متعدد نشیبی علاقے زیرِ آب آ گئے ہیں اور شہری شدید خطرات کا سامنا کر رہے ہیں۔
طوفان کے اثرات کے پیش نظر 50 سے زائد پروازیں منسوخ کی گئی ہیں تاکہ مسافروں اور ایئرپورٹ عملے کی حفاظت کو یقینی بنایا جا سکے۔
حکام نے شہریوں کو انتباہ کیا ہے کہ وہ ساحلی علاقوں میں غیر ضروری سفر سے گریز کریں اور محفوظ مقامات پر قیام کریں۔
یہ طوفان سری لنکا میں پہلے ہی شدید تباہی کا سبب بن چکا ہے وہاں شدید بارشوں، سیلاب اور لینڈ سلائیڈنگ کے نتیجے میں کم از کم 153 افراد ہلاک ہو چکے ہیں۔
غیر ملکی خبر ایجنسی کے مطابق زیادہ تر اموات لینڈ سلائیڈنگ کی وجہ سے ہوئی ہیں جب کہ شمالی اور مشرقی علاقوں میں 300 ملی میٹر تک بارش نے زمین کھسکنے کا سبب بنایا۔
سری لنکا میں حکومت نے ایمرجنسی نافذ کر دی تھی اور ریسکیو ٹیمیں متاثرہ علاقوں میں امدادی سرگرمیاں انجام دے رہی ہیں۔
ہلاک ہونے والوں میں متعدد خواتین اور بچے بھی شامل ہیں، جبکہ ہزاروں افراد اپنے گھروں سے بے گھر ہو گئے ہیں۔
مقامی انتظامیہ نے حفاظتی اقدامات میں شدت لائی ہے اور عوام سے اپیل کی ہے کہ وہ سرکاری ہدایات پر عمل کریں۔ماہرین کا کہنا ہے کہ طوفان دتوا بھارت پہنچنے سے قبل شدت میں مزید اضافہ ہو سکتا ہے، جس سے ساحلی علاقوں میں شدید نقصان اور انسانی ہلاکتوں کا خطرہ بڑھ سکتا ہے۔
حکام نے طوفان سے متاثر ہونے والے علاقوں میں فوری امدادی سامان، ریسکیو ٹیمیں اور عارضی پناہ گاہیں فراہم کرنے کے لیے اقدامات شروع کر دیے ہیں۔
By 
