مقامی اور عالمی مارکیٹ میں سونے کی قیمتوں میں ایک بار پھر اضافہ دیکھا گیا ہے۔
تفصیلات کے مطابق آل پاکستان صرافہ جیمز اینڈ جیولرز ایسوسی ایشن کے مطابق فی تولہ سونا 3 ہزار روپے کے اضافے کے بعد 4 لاکھ 50 ہزار روپے پر پہنچ گیا۔
مقامی مارکیٹ میں 22قیراط فی تولہ سونا 4 لاکھ 12 ہزار 500روپے جبکہ 21قیراط 3 لاکھ 93 ہزار 750 روپے کا ہوگیا ، دوسری طرف 10گرام چاندی کی قیمت 6650 روپے ہوگئی ۔
ماہرین کا کہنا ہے کہ عالمی سطح پر امریکی ڈالر کی قدر میں کمی اور بین الاقوامی معاشی غیر یقینی صورتحال اس اضافے کی بڑی وجہ ہیں، مقامی سطح پر بھی صرافہ مارکیٹ میں طلب میں اضافہ اور روپے کی قدر میں تبدیلی نے سونے کی قیمتوں کو متاثر کیا ہے، آئندہ چند روز میں سونے کی قیمتوں میں مزید اتار چڑھاؤ ممکن ہے، کیونکہ عالمی معاشی صورتحال اور مقامی مارکیٹ کے عوامل ابھی بھی غیر مستحکم ہیں۔
عالمی سطح پر سونا ایک محفوظ سرمایہ کاری کے طور پر جانا جاتا ہے اور اکثر سرمایہ کار غیر یقینی اقتصادی حالات میں سونے میں سرمایہ کاری کو ترجیح دیتے ہیں ، ماہرین کا کہنا ہے کہ اگر عالمی منڈی میں سونے کی قیمتوں میں اضافہ جاری رہا تو مقامی مارکیٹ میں مزید اضافہ دیکھا جا سکتا ہے۔
دنیا بھرمیں سونے کے ذخائر کے حوالے سے امریکا پہلے نمبر پرہے جبکہ ایشیا میں یہ اعزاز چین کے پاس ہے، بھارت عالمی سطح پر آٹھویں اورایشیا میں دوسرے نمبر پر ہے، پاکستان عالمی فہرست میں 49 ویں نمبر ہے۔
رپورٹ کے مطابق امریکا، جرمنی اور اٹلی سونے کے ذخائر کے حوالے سرفہرست ہیں، ایشیاء میں چین اور بھارت سونے کے سب سے زیادہ ذخائر رکھتے ہیں، ورلڈ گولڈ کونسل کے مطابق مختلف ممالک کے مرکزی بینکوں نے 2024ء میں 1,000 میٹرک ٹن سے زائد سونا خریدااور پچھلی دہائی کی اوسط سالانہ خریداری کے تقریباً دگنا کے برابر ہے۔
ادھر عالمی مالیاتی ادارے مورگن اسٹینلی کی تازہ رپورٹ میں پیشگوئی کی گئی ہے کہ آنے والے سالوں میں سونے کی قیمتیں نئی بلندیوں کو چھو سکتی ہیں ، رپورٹ کے مطابق اگر عالمی معیشت میں مزید عدم استحکام پیدا ہوا، یا شرح سود میں واضح کمی آئی، تو سونے کی عالمی قیمتیں تاریخی سطح تک پہنچ سکتی ہیں۔
By 
