پاکستان نے سری لنکا میں آنے والے تباہ کن سمندری طوفان ڈِٹواہ کے بعد انسانی ہمدردی کی بنیاد پر بڑی مقدار میں امدادی سامان بھیج کر متاثرہ عوام سے اپنی یکجہتی کا عملی ثبوت دیا ہے۔
ترجمان دفتر خارجہ طاہر حسین اندرابی کے مطابق پاکستان نے 200 ٹن سے زائد انسانی امدادی سامان سمندری راستے سے کولمبو روانہ کیا ہے جو طوفان سے متاثرہ علاقوں میں جاری امدادی اور بحالی کی سرگرمیوں میں اہم کردار ادا کرے گا۔
اسلام آباد میں امدادی سامان کی روانگی کے موقع پر ایک خصوصی تقریب منعقد ہوئی جس میں نہ صرف پاکستانی حکام بلکہ سری لنکا کی اعلیٰ قیادت کے نمائندے بھی موجود تھے۔
تقریب میں وزیرِ مملکت برائے خزانہ بلال اظہر کیانی خصوصی طور پر شریک ہوئے جبکہ پاکستان میں تعینات سری لنکن ہائی کمشنر ایڈمرل رویندرا سی. وجے گنارتنے نے بھی شرکت کی۔
اس اقدام کو دونوں ممالک کے دیرینہ دوستانہ تعلقات کی مضبوط مثال قرار دیا تقریب میں وزارتِ خارجہ کے افسران، نیشنل ڈیزاسٹر مینجمنٹ اتھارٹی کے سینئر حکام اور متعلقہ اداروں کے نمائندے بھی شریک تھے۔
ترجمان دفتر خارجہ نے اس موقع پر کہا کہ پاکستان نے ہر مشکل وقت میں سری لنکا کے عوام کا ساتھ دیا ہے اورآئندہ بھی ایسی امدادی سرگرمیوں میں بھرپور تعاون جاری رکھا جائے گا۔
ان کا کہنا تھا کہ قدرتی آفات کے دوران فوری اور مؤثر امداد کی فراہمی نہ صرف انسانی اقدار کا تقاضا ہے بلکہ خطے میں باہمی تعاون اور ہم آہنگی کو فروغ دینے کے لیے بھی ضروری ہے۔
طاہر حسین اندرابی نے مزید کہا کہ سری لنکا حالیہ طوفان کے باعث شدید متاثر ہوا ہے اور ایسے وقت میں پاکستان کا یہ اقدام دونوں ممالک کے درمیان بھائی چارے کے رشتے کو مزید مضبوط بناتا ہے۔انہوں نے زور دیا کہ پاکستان ہر سطح پر سری لنکن عوام کے ساتھ کھڑا ہے اور مشکل کی اس گھڑی میں ان کی مکمل مدد کے لیے تیار ہے۔
By 
