پنجاب کے وزیرِ تعلیم رانا سکندر حیات نے صوبے بھر کے تعلیمی اداروں کے لیے موسمِ سرما کی تعطیلات سے متعلق شیڈول جاری کرتے ہوئے بتایا ہے کہ رواں سال سرکاری اور نجی تمام سکولوں میں سردیوں کی چھٹیاں 22 دسمبر سے شروع ہو کر 10 جنوری تک جاری رہیں گی۔
اس اعلان کے ساتھ ہی تعلیمی حلقوں میں پائی جانے والی بے یقینی بھی ختم ہو گئی ہے، کیونکہ اس بار تعطیلات کا فیصلہ پہلے سے طے شدہ تاریخوں کے مطابق کیا گیا ہےوزیرِ تعلیم کے مطابق حکومت نے اسموگ کی صورتحال، موسم کی شدت اور تعلیمی کیلنڈر کو مدنظر رکھتے ہوئے یہ فیصلہ کیا ہے۔
انہوں نے واضح کیا کہ اگرچہ صوبے کے بعض شہروں میں اسموگ کے باعث موسم اب بھی دھندلا ہے، لیکن ماہرین کی مشاورت کے بعد اس نتیجے پر پہنچا گیا ہے کہ موجودہ شیڈول میں کسی قسم کی توسیع کی ضرورت نہیں۔
ان کا کہنا تھا کہ تعطیلات میں اضافہ نہیں کیا جائے گا اور تمام تعلیمی ادارے 11 جنوری کو معمول کے مطابق دوبارہ کھل جائیں گے۔
محکمہ تعلیم نے والدین اور اساتذہ کو مشورہ دیا ہے کہ چھٹیوں کے دوران بچے سخت سردی سے بچاؤ کے لیے احتیاطی تدابیر اختیار کریں، جیسے گرم ملبوسات کا استعمال، مناسب نیند اور صحت بخش غذاؤں کا انتخاب ساتھ ہی طلبہ کو یہ بھی ہدایت کی گئی ہے کہ وہ اس وقفے کو محض کھیل یا آرام تک محدود نہ کریں۔
ہلکی پھلکی تعلیمی سرگرمیاں بھی جاری رکھیں، تاکہ نیا تعلیمی سیشن شروع ہونے پر انہیں کسی قسم کی دشواری کا سامنا نہ کرنا پڑے ۔
حکومت کی جانب سے اس واضح اور بروقت اعلان کو والدین کی طرف سے بھی سراہا جا رہا ہے، کیونکہ اس سے انہیں اپنی گھریلو اور سفری منصوبہ بندی کرنے میں آسانی ہو گی۔
By 
