آٹھویں میری ٹائم سیکورٹی ورکشاپ کے شرکاء نے بدھ کے روز نیول ہیڈکوارٹر اسلام آباد کا تفصیلی دورہ کیا، جہاں اُن کی پاک بحریہ کے سربراہ ایڈمرل نوید اشرف سے ملاقات ہوئی۔
اس ملاقات کا مقصد شرکاء کو پاکستان کے میری ٹائم چیلنجز، مواقع اور خطے میں ابھرتی ہوئی جیو اسٹریٹجک صورتحال سے قریب تر آگاہی فراہم کرنا تھا۔
ایڈمرل نوید اشرف نے گفتگو کے دوران پاکستان کی سمندری ذمہ داریوں، بدلتے عالمی میری ٹائم ماحول اور علاقائی سکیورٹی کے تناظر میں بلیو اکانومی کی بڑھتی ہوئی اہمیت پر تفصیل سے روشنی ڈالی۔
انہوں نے کہا کہ سمندر نہ صرف دفاعی اعتبار سے اہم ہیں بلکہ مستقبل کی معیشت، تجارت اور توانائی کے بڑے ذرائع بھی انہی پانیوں سے وابستہ ہیں۔
اس لیے ضروری ہے کہ پاکستان جدید تقاضوں کے مطابق میری ٹائم شعور اور سیکیورٹی کو مضبوط کرے۔
چیف آف نیول اسٹاف نے شرکاء کو پاک بحریہ کی دفاعی صلاحیتوں، خطے میں امن و استحکام کیلئے اس کے کردار اور پاک بحریہ کے مارکۂ حق جیسے آپریشنز میں ناقابلِ تسخیر مہارت کے بارے میں آگاہ کیا۔
انہوں نے مشترکہ میری ٹائم فورسز کے ساتھ پاکستان کے فعال اشتراک اور ریجنل میری ٹائم سیکیورٹی پٹرولز میں مسلسل شمولیت کو بھی اجاگر کیا، جسے ورکشاپ کے شرکاء نے سراہا۔
شرکاء کے لیے خصوصی بریفنگز کا بھی اہتمام کیا گیا جن میں جدید دور کے میری ٹائم خطرات، میری ٹائم ڈومین آگاہی، نگرانی کے نئے نظام اور چیلنجز سے نمٹنے کی حکمتِ عملی پر جامع تبادلہ خیال کیا گیا ۔
By 
