ڈرائیونگ لائسنس بنوانے والوں کیلئے ایک اور اہم خبر سامنے آگئی

پنجاب میں نئے ٹریفک قوانین کے نفاذ کے بعد صوبے بھر میں ڈرائیونگ لائسنس حاصل کرنے والوں کی تعداد میں غیر معمولی اضافہ ریکارڈ کیا گیا ہے۔

ٹریفک پولیس کے مطابق صوبے کے مختلف لائسنسنگ سینٹرز پر گزشتہ 24 گھنٹوں کے دوران شہریوں کی بڑی تعداد نے لائسنس کے لیے رجوع کیا، اور صرف ایک دن میں 2 لاکھ 7 ہزار افراد نے مختلف لائسنسنگ سروسز سے فائدہ اٹھایا۔ یہ تعداد معمول کے مقابلے میں حیران کن حد تک زیادہ ہے۔

ٹریفک پولیس کے ترجمان نے بتایا کہ عام دنوں میں روزانہ تقریباً 25 ہزار سے 28 ہزار ڈرائیونگ لائسنس جاری کیے جاتے تھے۔ تاہم نئے قوانین کے اطلاق کے بعد اعداد و شمار میں 629 فیصد تک کا اضافہ ہوا ہے، جو اس بات کی نشاندہی کرتا ہے کہ شہریوں کی بڑی تعداد قانونی تقاضے پورے کرنے کے لیے لائسنسنگ سینٹرز کا رخ کر رہی ہے۔

جاری کیے گئے اعداد و شمار کے مطابق ایک لاکھ سے زیادہ افراد نے لرننگ ڈرائیونگ لائسنس حاصل کیا، جب کہ تقریباً 28 ہزار 800 شہریوں نے باقاعدہ ڈرائیونگ لائسنس بنوائے۔ اس کے علاوہ 78 ہزار سے زائد افراد نے اپنے لرننگ، ریگولر اور انٹرنیشنل لائسنس کی تجدید کروائی۔ مزید یہ کہ 15 ہزار سے زیادہ شہریوں نے اپنے گمشدہ ڈرائیونگ لائسنس دوبارہ تیار کروائے، جس سے مجموعی طور پر لائسنسنگ سسٹم پر نمایاں دباؤ بڑھ گیا۔

یہ بھی پڑھیں: کیا مستقبل میں استعمال شدہ گاڑیاں سستی ہوں گی یا مہنگی؟، حکومت کی طرف سے بڑا فیصلہ متوقع

ڈی آئی جی ٹریفک پنجاب محمد وقاص نذیر نے صورتِ حال پر بات کرتے ہوئے کہا کہ سخت قوانین نے شہریوں میں ذمہ داری کا احساس بڑھایا ہے، اور اسی وجہ سے لائسنس سینٹرز پر غیر معمولی رش دیکھنے میں آ رہا ہے۔ انہوں نے شہریوں کو مشورہ دیا کہ وہ طویل قطاروں اور وقت کے ضیاع سے بچنے کے لیے آن لائن لائسنسنگ پورٹل کا استعمال کریں۔ ان کا کہنا تھا کہ پورٹل کے ذریعے لائسنس بنوانے کا عمل نہ صرف آسان ہے بلکہ اس سے شہریوں کا قیمتی وقت بھی محفوظ رہ سکتا ہے۔

ڈی آئی جی کے مطابق عوام کی بڑھتی ہوئی دلچسپی اس بات کی علامت ہے کہ شہری ٹریفک قوانین پر عمل درآمد کے حوالے سے زیادہ سنجیدہ ہوتے جا رہے ہیں، اور نئے قوانین نے لوگوں میں نظم و ضبط اور ٹریفک قوانین کی پابندی کی اہمیت کو مزید اجاگر کیا ہے۔