حکومت کا تمام عارضی ملازمین کی مستقلی کا اعلان

صدر آزاد کشمیر نے اسکیل ایک کے ملازمین کو ان کی بنیادی تنخواہ کے برابر اعزازیہ دینے کی باضابطہ منظوری دے دی ہے۔ یہ فیصلہ آزاد کشمیر کابینہ کے اجلاس میں کیے گئے فیصلے کی روشنی میں کیا گیا، جس میں اس سلسلے میں اعزازیہ دینے کی تجویز منظور کی گئی تھی۔

اس اعلان کے بعد اسکیل ایک کے تمام ملازمین کو بنیادی تنخواہ کے مساوی اعزازیہ ملے گا۔ حکام کے مطابق اس فیصلے کا مقصد نچلے اسکیل کے سرکاری ملازمین کی مالی معاونت کرنا اور انہیں ریلیف فراہم کرنا ہے، جو اپنی خدمات کے باوجود محدود وسائل کا سامنا کرتے ہیں۔

واضح رہے کہ آزاد کشمیر کے نومنتخب وزیراعظم راجا فیصل ممتاز راٹھور نے اپنے پہلے خطاب میں اسکیل ایک کے ملازمین کے لیے ایک اضافی تنخواہ دینے کا اعلان کیا تھا۔ انہوں نے یہ بھی کہا تھا کہ حکومت نچلے گریڈ کے ملازمین کے مسائل حل کرنے کے لیے اقدامات کرے گی۔

یہ بھی پڑھیں: اقوام متحدہ کا مقبوضہ کشمیر میں انسانی حقوق کی بگڑتی صورتحال پر شدید اظہارِ تشویش، بھارتی اقدامات کی سخت مذمت

اپنے ابتدائی خطاب میں وزیراعظم راجا فیصل ممتاز راٹھور نے اسکیل ایک کے تمام عارضی ملازمین کی مستقلی کا اعلان بھی کیا تھا۔ ان کے مطابق حکومت ان ملازمین کے روزگار کے استحکام کو یقینی بنانے کے لیے عملی اقدامات کرے گی، تاکہ وہ بہتر انداز میں اپنی ذمہ داریاں ادا کرسکیں۔

صدر آزاد کشمیر کی جانب سے اعزازیہ کی منظوری کے بعد توقع کی جارہی ہے کہ متعلقہ محکمے جلد اس فیصلے پر عملدرآمد کے لیے ضروری اقدامات شروع کریں گے، تاکہ ملازمین کو یہ مالی فائدہ بروقت پہنچایا جاسکے۔ اس فیصلے کو سرکاری ملازمین کے لیے ایک مثبت قدم قرار دیا جا رہا ہے، جس سے نچلے گریڈ کے ملازمین کی حوصلہ افزائی ہوگی۔

یہ بھی پڑھیں: ٹی ٹی اے کی چمن بارڈر پر بلا اشتعال فائرنگ، پاکستانی سیکیورٹی فورسز کی مؤثر جوابی کاروائی، افغان طالبان کی متعدد چیک پوسٹس اور بکتر بندٹینک تباہ