آرمی چیف، چیف آف ڈیفنس فورسز، فیلڈمارشل سید عاصم منیر کے اعزاز میں پر وقار تقریب، گارڈ آف آنر پیش

آرمی چیف، چیف آف ڈیفنس فورسز اور فیلڈ مارشل سید عاصم منیر کے اعزاز میں جنرل ہیڈ کوارٹر (جی ایچ کیو) میں ایک پروقار اور خصوصی تقریب منعقد کی گئی، جس میں تینوں مسلح افواج کے چاق و چوبند دستوں نے مہمانِ خصوصی کو گارڈ آف آنر پیش کیا۔‘

یہ بھی پڑھیں:فیلڈ مارشل سید عاصم منیر کی بطور چیف آف ڈیفنس فورسز تعیناتی کا نوٹیفکیشن جاری

پیر کو ہونے والی یہ تقریب آرمی چیف، چیف آف ڈیفنس فورسز فیلڈ مارشل سید عاصم منیر کی بطور پاکستان کے پہلے ’چیف آف ڈیفنس فورسز‘ تعیناتی کے موقع پر ان کے اعزاز میں ترتیب دی گئی تھی۔

تقریب کے دوران ’پاک آرمی، پاک نیوی اور پاک فضائیہ کے مشترکہ اعزازی دستے نے فیلڈ مارشل سید عاصم منیر، نشان امتیاز (ملٹری)، ہلالِ جرات، چیف آف آرمی اسٹاف و چیف آف ڈیفنس فورسز کو شاندار گارڈ آف آنر پیش کیا۔‘ دستے کے ہم قدم مارچ اور پریسین مشقوں نے تقریب کو مزید وقار بخشا۔

’مہمانِ خصوصی کو اعزازی دستے کی جانب سے جنرل سلامی پیش کی گئی، جس کے بعد چیف آف ڈیفنس فورسز (سی ڈی ایف) فیلڈ مارشل سید عاصم منیر نے گارڈ آف آنر کا معائنہ کیا۔‘ اس موقع پر قومی ترانہ بجایا گیا جبکہ حاضرین نے پاک فوج کے تربیتی معیار اور پیشہ ورانہ مہارت کو سراہا۔

مزید پڑھیں:وزیراعظم نے فیلڈ مارشل سید عاصم منیر کی بطور آرمی چیف و سی ڈی ایف تعیناتی کی سمری منظوری کے بعد ایوان صدر کو بھجوا دی

تقریب میں ’چیف آف دی نیول اسٹاف، چیف آف ایئر اسٹاف ایئر چیف مارشل ظہیر احمد بابر سدھو اور دیگر سینیئر عسکری افسران بھی شریک تھے، جنہوں نے چیف آف ڈیفنس فورسز کو نئی ذمہ داریوں پر مبارک باد دی۔‘ عسکری قیادت کی یہ نمائندہ موجودگی اس موقع کی اہمیت کو مزید نمایاں کرتی رہی۔

’چیف آف ڈیفنس فورسز کے اعزاز میں منعقدہ یہ گارڈ آف آنر کی تقریب نہ صرف ان کی خدمات کا اعتراف تھی بلکہ پاکستان کی مسلح افواج کے باہمی تعاون اور اتحاد کا عملی مظہر بھی سمجھی جا رہی ہے۔‘