گاڑی خریدنے کے خواہشمند افراد کیلئے بڑی خوشخبری

جاپانی آٹو کمپنی ٹویوٹا نے چینی شراکت دار ایف اے ڈبلیو کے ساتھ مل کر نئی اور اپ ڈیٹ شدہ کرولا سیڈان متعارف کروا دی ہے۔

کمپنی کے مطابق نئی کرولا اس ماہ باقاعدہ طور پر مارکیٹ میں لانچ کی جائے گی۔ گاڑی کو سب سے پہلے گوانگژو موٹر شو میں پیش کیا گیا، جہاں اس کے تازہ ڈیزائن اور جدید فیچرز کو خاص توجہ ملی۔

نئی کرولا کے بیرونی حصے میں نمایاں تبدیلیاں کی گئی ہیں، خصوصاً اگلا حصہ ٹویوٹا کیمری اور پرائیس کے جدید ڈیزائن کا عکس پیش کرتا ہے۔ فرنٹ گرِل اور ہیڈ لائٹس کو پہلے کے مقابلے میں مزید اسپورٹی اور پریمیم شکل دی گئی ہے۔ اگرچہ گاڑی کے پچھلے حصے میں زیادہ تبدیلیاں نہیں کی گئیں، تاہم اس کی لمبائی میں معمولی اضافہ کیا گیا ہے، جس سے روڈ پریزنس بہتر ہو گئی ہے۔

اندرونی حصے میں بھی بڑی اپ گریڈز شامل ہیں۔ روایتی اینالاگ میٹرز کو ختم کر کے 8.8 انچ کا نیا ڈیجیٹل ڈسپلے لگا دیا گیا ہے۔ اس کے علاوہ ایک بڑی 12.9 انچ کی ہائی ریزولوشن انفوٹینمنٹ اسکرین نصب کی گئی ہے، جو مزید بہتر یوزر ایکسپیریئنس فراہم کرتی ہے۔ ٹویوٹا نے اس مرتبہ بیس ماڈلز میں بھی ٹویوٹا پائلٹ ڈرائیور اسسٹ سسٹم شامل کر دیا ہے، جو کمپنی کی ٹیکنالوجی کو معیاری بنانے کی نئی حکمتِ عملی کو ظاہر کرتا ہے۔

یہ بھی پڑھیں: گاڑیوں کے شوقین افراد کیلئے خوشخبری ، ایم جی کی نئی الیکٹرک گاڑی لانچ

گاڑی کے پاور ٹرین میں بھی اہم تبدیلی کی گئی ہے۔ نئی کرولا میں ہائبرڈ سسٹم شامل کیا گیا ہے جو 98 ہارس پاور پیدا کرتا ہے۔ چین میں اس نئے ماڈل کی فروخت اسی ماہ شروع ہونے کی توقع ہے، جبکہ قیمتوں کا اعلان اس کی باقاعدہ لانچنگ کے قریب کیا جائے گا۔

نئی کرولا سیڈان کے ڈیزائن، فیچرز اور ہائبرڈ ٹیکنالوجی کو دیکھتے ہوئے اسے کمپنی کی ایک بڑی اپ ڈیٹ قرار دیا جا رہا ہے، جو نہ صرف صارفین کی توجہ حاصل کرے گی بلکہ مارکیٹ میں ٹویوٹا کی پوزیشن کو مزید مضبوط بنانے میں مددگار ثابت ہو سکتی ہے۔