اوگرا نے دسمبر 2025 کے لیے گیس کی قیمتوں میں کمی کا باضابطہ نوٹیفکیشن جاری کر دیا ہے، جس کے تحت ملک کی دونوں بڑی گیس تقسیم کار کمپنیوں سوئی سدرن گیس کمپنی (ایس ایس جی سی) اور سوئی ناردرن گیس پائپ لائنز لمیٹڈ (ایس این جی پی ایل) کے نرخوں میں واضح کمی کی گئی ہے۔
یہ فیصلہ ایسے وقت میں سامنے آیا ہے جب مہنگائی اور توانائی کے بڑھتے اخراجات عوام اور صنعتی شعبے دونوں کے لیے ایک بڑا چیلنج بنے ہوئے ہیں۔
اوگرا کے جاری کردہ نوٹیفکیشن کے مطابق ایس ایس جی سی کے لیے گیس کی قیمت میں 0.67 ڈالر فی ایم ایم بی ٹی یو کمی کی گئی ہے۔ اس کمی کے بعد ایس ایس جی سی کی نئی قیمت 11 ڈالر 45 سینٹ سے کم ہو کر 10 ڈالر 77 سینٹ فی ایم ایم بی ٹی یو مقرر کی گئی ہے۔
اسی طرح ایس این جی پی ایل کے صارفین کے لیے بھی خوشخبری ہے، جہاں گیس کی قیمت میں 0.57 ڈالر فی ایم ایم بی ٹی یو کمی کی گئی ہے۔
اس فیصلے کے بعد ایس این جی پی ایل کی نئی قیمت 12 ڈالر 39 سینٹ سے گھٹ کر 11 ڈالر 82 سینٹ فی ایم ایم بی ٹی یو ہو گئی ہے۔اوگرا حکام کا کہنا ہے کہ یہ کمی دسمبر کے پورے مہینے کے لیے لاگو ہوگی، جس کا مقصد گیس کے شعبے میں لاگت کو متوازن رکھنا اور صارفین پر بوجھ کم کرنا ہے۔
ماہرین کے مطابق عالمی توانائی منڈی میں قیمتوں کے اتار چڑھاؤ اور درآمدی ایندھن کی لاگت کو مدنظر رکھتے ہوئے اوگرا نے یہ ایڈجسٹمنٹ کی ہے تاکہ مقامی صارفین کو کچھ ریلیف فراہم کیا جا سکے۔
صنعتی حلقوں کا خیال ہے کہ گیس کی قیمتوں میں کمی سے پیداواری لاگت کم ہونے میں مدد ملے گی، جس کا مثبت اثر برآمدات اور مجموعی معاشی سرگرمی پر پڑ سکتا ہے۔ خاص طور پر ٹیکسٹائل، کھاد، سیمنٹ اور دیگر توانائی پر انحصار کرنے والی صنعتوں کے لیے یہ فیصلہ اہم سمجھا جا رہا ہے۔
دوسری جانب گھریلو صارفین بھی امید کر رہے ہیں کہ اس کمی کا اثر مستقبل میں بلوں پر بھی نظر آئے گا۔توانائی کے ماہرین کا کہنا ہے کہ اگرچہ یہ کمی محدود مدت کے لیے ہے، تاہم یہ ایک مثبت اشارہ ہے کہ ریگولیٹری ادارے صارفین کے مسائل کو مدنظر رکھ رہے ہیں ،عوامی حلقوں نے مطالبہ کیا ہے کہ آئندہ مہینوں میں بھی قیمتوں کا تعین شفاف طریقے سے کیا جائے تاکہ طویل المدتی بنیادوں پر ریلیف ممکن ہو سکے۔
By 
