کراچی کے شہری ہوشیار ہو جائیں کیونکہ شہر میں موٹرسائیکل اور کار سواروں کے خلاف بھرپور کریک ڈاؤن شروع کرنے کا اعلان کر دیا گیا ہے۔
پولیس حکام کے مطابق یہ کارروائیاں کل سے باقاعدہ طور پر شروع کی جائیں گی اور خاص طور پر ان موٹرسائیکلوں اور گاڑیوں کے خلاف کارروائی کی جائے گی جن کی نمبر پلیٹس ٹیمپرڈ ہیں یا جان بوجھ کر چھپائی گئی ہیں۔
پولیس حکام کا کہنا ہے کہ اس کریک ڈاؤن کا بنیادی مقصد ٹریفک قوانین پر عملدرآمد کو یقینی بنانا اور ای چالان کے نظام کو مؤثر بنانا ہے۔ حکام نے واضح کیا ہے کہ ای چالان سے بچنے کی اب کوئی گنجائش باقی نہیں رہی اور تمام گاڑی مالکان کو قانون کے مطابق نمبر پلیٹس کا استعمال کرنا ہوگا۔
حکام کے مطابق اس کارروائی میں صرف ٹریفک پولیس ہی نہیں بلکہ ضلعی پولیس، ایکسائز ڈیپارٹمنٹ اور ڈی پی ایل سی بھی مشترکہ طور پر حصہ لیں گے۔ مختلف اداروں کی مشترکہ کارروائیوں کے ذریعے شہر بھر میں ٹیمپرڈ، غیر معیاری یا چھپائی گئی نمبر پلیٹس کے خلاف سخت اقدامات کیے جائیں گے۔
پولیس حکام نے شہریوں کو پیشگی وارننگ دیتے ہوئے کہا ہے کہ آج کا دن موٹرسائیکل اور کار سواروں کے لیے آخری موقع ہے کہ وہ اپنی گاڑیوں کی نمبر پلیٹس درست کروا لیں۔ حکام کا کہنا ہے کہ مقررہ وقت کے بعد کسی قسم کی رعایت نہیں دی جائے گی اور خلاف ورزی کرنے والوں کے خلاف قانون کے مطابق کارروائی عمل میں لائی جائے گی۔
پولیس کے مطابق اگر کسی موٹرسائیکل یا کار کی نمبر پلیٹ ٹیمپرڈ، غیر واضح یا چھپائی گئی پائی گئی تو نہ صرف گاڑی یا موٹرسائیکل کو ضبط کیا جائے گا بلکہ ڈرائیور کے خلاف مقدمہ بھی درج کیا جائے گا۔ اس اقدام کا مقصد ٹریفک قوانین کی خلاف ورزیوں کی روک تھام اور شہریوں میں قانون کی پاسداری کو فروغ دینا ہے۔
پولیس حکام نے شہریوں سے اپیل کی ہے کہ وہ قانون نافذ کرنے والے اداروں سے تعاون کریں اور اپنی گاڑیوں کی نمبر پلیٹس سرکاری قواعد کے مطابق رکھیں تاکہ کسی بھی قانونی کارروائی سے بچا جا سکے۔ حکام کے مطابق یہ کریک ڈاؤن شہریوں کی حفاظت اور بہتر ٹریفک نظام کے لیے ضروری ہے اور اس میں کسی کے ساتھ نرمی نہیں برتی جائے گی۔
By 
