ہنڈا نے قسطوں پر گاڑی حاصل کرنے کی نئی آفر متعارف کرا دی

معروف کار ساز کمپنی ہونڈا نے صارفین کے لیے قسطوں پر گاڑی حاصل کرنے کی ایک نئی اور پرکشش پیشکش متعارف کرا دی ہے۔

اس نئی آفر کے ذریعے گاڑیوں کے شوقین افراد اب ہونڈا کی مختلف ماڈلز کو نسبتاً آسان اقساط اور خصوصی سہولیات کے ساتھ حاصل کر سکتے ہیں۔ اس اقدام کا مقصد صارفین کو بہتر مالی سہولت فراہم کرنا اور گاڑی خریدنے کے عمل کو مزید آسان بنانا ہے۔

ہونڈا کمپنی نے اس نئی فنانسنگ اسکیم کے لیے حبیب میٹرو بینک کے ساتھ اشتراک کیا ہے۔ اس شراکت داری کے تحت ہونڈا سٹی، ہونڈا سوِک اور ہونڈا ایچ آر-وی کے لیے خصوصی فنانسنگ اسکیم متعارف کرائی گئی ہے، جس میں کم شرح سود کے ساتھ اضافی مراعات بھی شامل کی گئی ہیں تاکہ صارفین کو روایتی آٹو فنانسنگ کے مقابلے میں بہتر آپشن فراہم کیا جا سکے۔

اس آفر کے تحت فنانسنگ ریٹ ایک فیصد اور کائی بور مقرر کیا گیا ہے، جو عام کمرشل آٹو لونز کے مقابلے میں زیادہ شفاف اور کم پھیلاؤ والا حل بتایا جا رہا ہے۔ اس کے علاوہ اس اسکیم کے تحت بینک کی جانب سے دو لاکھ روپے تک کی مختلف فیسیں بھی کور کی جائیں گی، جس سے گاڑی خریدنے کی مجموعی لاگت میں نمایاں کمی واقع ہو گی۔

یہ بھی پڑھیں: اوگرا نے ملک بھر میں پیٹرول پمپس کی جانچ کے لیے ٹیمیں متحرک کر دیں

مزید یہ کہ اس اسکیم میں صارفین کو پہلے سال کے لیے مفت پیریاڈک مینٹی ننس کی سہولت بھی فراہم کی جا رہی ہے۔ گاڑیوں میں درآمد شدہ بریج اسٹون ٹائرز استعمال کیے جائیں گے، جن کی مالیت تقریباً ایک لاکھ روپے کے لگ بھگ بتائی گئی ہے، جو اس پیشکش کو مزید پرکشش بناتی ہے۔

ہونڈا کی اس نئی آفر کے تحت گاڑیوں کی ڈیلیوری اسی ماہ یعنی دسمبر میں یقینی بنائی گئی ہے، جس سے صارفین کو طویل انتظار کے مسئلے سے نجات ملے گی۔ تاہم واضح کیا گیا ہے کہ اس پیشکش پر حبیب میٹرو بینک کی شرائط و ضوابط لاگو ہوں گی۔

کمپنی کے مطابق اس اسکیم میں دلچسپی رکھنے والے صارفین حبیب میٹرو بینک سے براہ راست رابطہ کر کے مکمل ادائیگی کے شیڈول، فنانسنگ کی تفصیلات اور کائی بور کی ایڈجسٹمنٹ کی فریکوئنسی کے بارے میں مزید معلومات حاصل کر سکتے ہیں۔

یہ بھی پڑھیں:  ہونڈا کی من پسند گاڑی خریدنا اب ہر کسی کیلئے ممکن، مگر کیسے؟