موسم سرما کی شدت کا آغاز، بارش، پہاڑوں پر برفباری، محکمہ موسمیات کی نئی پیشگوئی جاری

بلوچستان میں طویل انتظار کے بعد بارشوں کا سلسلہ شروع ہو گیا ہے، جس کے باعث صوبے بھر میں موسم یکسر بدل گیا اور سردی کی شدت میں نمایاں اضافہ ریکارڈ کیا گیا ہے۔ بارش کے بعد کئی علاقوں میں سرد ہوائیں چلنے لگیں، جب کہ درجہ حرارت میں واضح کمی محسوس کی جا رہی ہے، جس سے سرد موسم کا احساس دوچند ہو گیا ہے۔

یہ بھی پڑھیں:بلوچستان میں موسم سرما کی پہلی بارش،بجلی کی سپلائی معطل

محکمہ موسمیات کے مطابق کوئٹہ اور اس کے گردونواح میں صبح کے وقت ہلکی بارش ہوئی، جس سے موسم اگرچہ خوشگوار ہو گیا تاہم سردی میں اضافہ دیکھا گیا۔ اسی طرح چمن، پنجگور، قلات، لورالائی، خاران اور قلعہ سیف اللہ میں بھی بارش کے بعد درجہ حرارت کم ہو گیا اور سرد ہوائیں چلنے لگیں، جس کے باعث شہریوں نے گرم ملبوسات کا استعمال شروع کر دیا ہے۔

محکمہ موسمیات کے مطابق اتوار سے شمالی زیارت اور ملحقہ علاقوں میں مزید بارش کا امکان ہے، جبکہ پہاڑی علاقوں میں برفباری بھی ہو سکتی ہے۔ محکمہ کے مطابق اس موسمی صورتحال کے باعث آئندہ چند دنوں میں سردی کی شدت مزید بڑھنے کا خدشہ ہے۔

دوسری جانب پنجاب کے شہر سرگودھا میں بوندا باندی سے موسم سرد ہو گیا، جس کے بعد شہریوں نے سردی کی شدت میں اضافے کی شکایت کی۔

ادھر وفاقی دارالحکومت اسلام آباد اور راولپنڈی کے مختلف علاقوں میں بھی بارش ریکارڈ کی گئی، بعض مقامات پر ہلکی جبکہ کہیں تیز بارش ہوئی، جس سے موسم مزید سرد ہو گیا۔ محکمہ موسمیات نے آئندہ چند روز تک وقفے وقفے سے بارش کا سلسلہ جاری رہنے کی پیش گوئی کی ہے۔

خیبر پختونخوا کے بالائی علاقوں میں بھی موسم نے کروٹ لے لی ہے۔ وادی سوات کے مختلف سیاحتی مقامات مہوڈنڈ، کالام، مالم جبہ اور گبین جبہ میں برفباری کا سلسلہ جاری ہے، جس کے باعث میدانی علاقوں میں بھی شدید سردی کی لہر پھیل گئی ہے۔

مزید پڑھیں:خیبرپختونخوا کے تعلیمی اداروں میں بھی موسم سرما کی تعطیلات کا اعلان

برفباری کے دلکش مناظر دیکھنے اور سنو فال سے لطف اندوز ہونے کے لیے ملک کے مختلف حصوں سے سیاح بڑی تعداد میں وادی سوات پہنچ رہے ہیں، جس سے مقامی ہوٹلوں اور سیاحتی مقامات پر رش دیکھنے میں آ رہا ہے۔

خیبر پختونخوا کے ضلع ہری پور میں طویل خشک سالی کے بعد بارش کا آغاز ہوا ہے۔ ہری پور، تحصیل خانپور اور غازی میں بارش سے موسم خوشگوار ہو گیا جبکہ کسانوں کے چہرے خوشی سے کھل اٹھے ہیں، کیونکہ اس بارش کو گندم اور دیگر فصلوں کے لیے انتہائی فائدہ مند قرار دیا جا رہا ہے۔

اسی طرح ایبٹ آباد شہر اور اس کے گردونواح میں بھی ہلکی بارش شروع ہو گئی ہے، جس کے نتیجے میں سردی کی شدت میں اضافہ ہو گیا ہے۔

مجموعی طور پر ملک کے مختلف حصوں میں بارش اور برفباری کے باعث موسم سرد ہو چکا ہے، جبکہ محکمہ موسمیات اور ضلعی انتظامیہ کی جانب سے شہریوں کو سرد موسم میں احتیاطی تدابیر اختیار کرنے، غیر ضروری سفر سے گریز کرنے اور بالائی علاقوں میں برفباری کے دوران محتاط رہنے کی ہدایت کی جا رہی ہے۔