بھارتی پائلٹس کی کارکردگی پر سوالیہ نشان، عالمی میڈیا نے ذہنی دباؤ اور ناقص اسکریننگ کا پردہ چاک کردیا

عالمی میڈیا نے بھارتی فضائیہ اور سول ایوی ایشن کے پائلٹس کی ذہنی صحت کے حوالے سے سنگین خطرات اور مجرمانہ غفلت کا پردہ چاک کر دیا ہے، جہاں مسلسل پیشہ ورانہ خستگی اور ذہنی دباؤ کے شکار پائلٹس نے مسافروں کی زندگیوں کو سنگین خطرے میں ڈال دیا ہے۔

یہ بھی پڑھیں:پاکستان سے جنگ میں شکست کے بعد سینکڑوں بھارتی جنگی پائلٹس نے استعفیٰ دے دیئے

این ڈی ٹی وی کی رپورٹس کے مطابق دہلی ایئرپورٹ پر ایئر انڈیا ایکسپریس کے پائلٹ وریندر سیجوال نے بورڈنگ قطار توڑنے پر ایک مسافر پر بہیمانہ تشدد کیا، جس سے فضائی عملے کی خستہ ذہنی کیفیت اور ایوی ایشن سیکٹر میں نفسیاتی ناکامی کے پہلو سامنے آئے۔

نیویارک پوسٹ کی رپورٹس کے مطابق ایئر انڈیا کے پائلٹس میں حادثات کے دوران ڈپریشن اور ذہنی مسائل موجود تھے اور احمدآباد حادثے سے قبل بھی ذہنی دباؤ کے شکار پائلٹ کو فلائٹ کلیئرنس دینے پر ایئر انڈیا کو شدید تنقید کا سامنا کرنا پڑا۔ عالمی میڈیا نے اس امر کو تشویشناک قرار دیا کہ سول ایوی ایشن کے ناقص نفسیاتی اسکریننگ کے سبب پائلٹس خود مسافروں کے لیے سنگین خطرہ بن گئے ہیں۔

مزید پڑھیں:ایئر انڈیا کی آڈٹ رپورٹ میں سنسنی خیز انکشاف، جعلسازی اور پائلٹس کے ناقص تربیتی سٹرکچر سمیت 51 حفاظتی خامیوں کی نشاندہی

مزید براں، حال ہی میں دبئی ایئرشو میں بھارتی طیارہ تیجس کی تباہی نے بھارتی فضائیہ کے تربیتی معیار کو بھی عالمی سطح پر زیر سوال لا دیا، جبکہ پاک فضائیہ کے ہاتھوں رافیل طیارے ہارنے کے واقعے نے بھارتی فضائیہ کی ناکامی کو مزید اجاگر کر دیا۔

واضح رہے کہ دفاعی تجزیہ کاروں کا کہنا ہے کہ بھارتی فضائیہ اور سول ایوی ایشن کے ناقص نفسیاتی اور تربیتی معیار نے بھارت کو عالمی رسوائی کے گہرے بحران میں دھکیل دیا ہے، اور اس صورتحال نے دنیا بھر میں مسافروں اور فضائی سیکٹر کے ماہرین میں شدید تشویش پیدا کر دی ہے۔