عمران خان افراتفری چاہتے ہیں لیکن سیاست اور جمہوریت مذاکرات سے آگے بڑھتی ہے : رانا ثناء

وزیراعظم کے مشیر برائے سیاسی امور رانا ثنااللہ کا کہنا ہے کہ سیاست اور جمہوریت مذاکرات سے آگے بڑھتی ہے، ڈیڈلاک سے نہیں، سیاسی جماعتوں کو مل بیٹھ کر مسائل پر بات کرنی چاہیے۔

رانا ثنا اللہ نے اپنے ایک بیان میں کہا ہے کہ مسلم لیگ (ن) نے ہمیشہ چارٹر آف ڈیموکریسی اور چارٹر آف اکانومی کے لیے کوشش کی ہے، وزیراعظم شہباز شریف نے کل کابینہ اجلاس میں بھی واضح کیا کہ حکومت بات چیت کے لیے تیار ہے اور اس سے قبل بھی پی ٹی آئی کو چار مرتبہ مذاکرات کی دعوت دی جا چکی ہے۔

ان کا کہنا تھا وزیراعظم پہلے بھی چار بار پی ٹی آئی کو مذاکرات کی دعوت دے چکے ہیں، مذاکرات کی دعوت کے جواب میں بانی پی ٹی آئی نے مثبت جواب نہیں دیا۔

رانا ثنا اللہ نے کہا کہ بانی پی ٹی آئی سیاست نہیں کر رہے، مذاکرات کرنا ان کی پالیسی میں نہیں ہے،بانی پی ٹی آئی کے سوا ان کی جماعت میں اورکسی کے پاس اختیارات نہیں ہیں۔

انہوں نے کہا کہ بانی پی ٹی آئی عمران خان مذاکرات نہیں، افراتفری چاہتے ہیں، اس طرح سے حکومت کے ساتھ مذاکرات نہیں ہو سکتے۔

رانا ثنااللہ کا کہنا تھا کہ بانی پی ٹی آئی نے سیاست کبھی نہیں کی، نہ ہی اپنے چار سالہ دور میں سیاسی رویہ اپنایا، ان کی پالیسی میں بات چیت، مذاکرات اور مسائل کا حل شامل نہیں بلکہ وہ فتنہ، فساد اور انارکی پر یقین رکھتے ہیں۔

یہ بھی پڑھیں : پی ٹی آئی سنجیدہ ہو تو حکومت مذاکرات کے لیے تیار ہے، وزیراعظم شہباز شریف

انہوں نے کہا ہے کہ سلمان اکرم راجہ اور علیمہ خان نے بھی وہی مؤقف دہرایا جو بانی پی ٹی آئی کی ہدایت ہے، بانی پی ٹی آئی آج بھی اپنی جماعت کو پیغامات دے رہے ہیں اور ماضی میں 25 مئی 2022، 9 مئی اور 26 نومبر 2024 کے واقعات اسی پالیسی کا تسلسل تھے۔

لیگی رہنما نے کہا ہے کہ اگر ملاقاتوں کو کنٹرول نہ کیا جاتا تو رواں سال بھی فتنہ و فساد اور انارکی پھیلانے کا ارادہ تھا اور ان کی منصوبہ بندی تصادم، افراتفری اور امن و امان کی صورتحال خراب کرنے کی ہے۔

انہوں نے کہا کہ کسی بھی بہانے سے اصل بات کو ادھر ادھر کرنا بانی پی ٹی آئی کی طے شدہ پالیسی ہے اور اب 8 فروری 2026 کو پہیہ جام ہڑتال کی بات بھی اسی سلسلے کی کڑی ہے، ان کے فتنہ و فساد کو آہنی ہاتھوں سے روکا جائے گا۔

رانا ثنا اللہ نے مزید کہا ہے کہ نواز شریف ایک سینئر سیاستدان ہیں جن کا طویل سیاسی سفر ہے اور انہوں نے ہمیشہ کردار ادا کیا ہے، جب کوئی دوسرا ٹیبل پر بیٹھ کر بات چیت کرے گا تو ہی آگے بڑھنے کا راستہ نکلے گا۔