پاکستان انٹرنیشنل ایئرلائنز (پی آئی اے) کی نجکاری کا عمل کامیابی کے ساتھ مکمل ہونے کے بعد اس کے مستقبل سے متعلق اہم تفصیلات سامنے آ گئی ہیں۔ نجکاری کے بعد پی آئی اے کے نام اور لوگو میں ممکنہ تبدیلی کے حوالے سے جاری قیاس آرائیوں کا خاتمہ ہو گیا ہے، کیونکہ حکومت نے قومی ایئر لائن کی شناخت برقرار رکھنے کا فیصلہ کر لیا ہے۔
ذرائع کے مطابق پی آئی اے کی نجکاری گزشتہ روز کامیابی سے طے پائی، جس میں عارف حبیب کنسورشیم نے سب سے زیادہ 135 ارب روپے کی بولی دے کر قومی فضائی کمپنی کی خریداری مکمل کی۔ یہ عمل طویل عرصے سے جاری نجکاری کے مرحلے کا ایک اہم سنگِ میل قرار دیا جا رہا ہے۔
نجکاری کے بعد سب سے اہم سوال یہ تھا کہ آیا پی آئی اے کا نام اور اس کا معروف لوگو تبدیل کیا جائے گا یا نہیں۔ اس حوالے سے سول ایوی ایشن سے وابستہ ذرائع نے واضح کیا ہے کہ حکومت پہلے ہی اس بات کا فیصلہ کر چکی ہے کہ پی آئی اے کی قومی شناخت کو ہر صورت برقرار رکھا جائے گا۔ ذرائع کے مطابق نجکاری کے باوجود پی آئی اے بدستور قومی ایئر لائن ہی کہلائے گی، اس کا نام تبدیل نہیں کیا جائے گا اور نہ ہی اس کے تاریخی اور پہچان بن چکے لوگو میں کوئی تبدیلی کی جائے گی۔
حکام کا کہنا ہے کہ پی آئی اے کا نام اور لوگو نہ صرف ایک برانڈ ہیں بلکہ ملکی تاریخ اور قومی تشخص کی علامت بھی سمجھے جاتے ہیں، اسی لیے ان میں کسی قسم کی تبدیلی سے گریز کیا گیا ہے۔ ذرائع کے مطابق نئے سرمایہ کار کو پی آئی اے کی انتظامی اور مالی اصلاحات کرنے کی مکمل اجازت ہو گی، تاکہ ادارے کو جدید خطوط پر استوار کیا جا سکے اور اس کی کارکردگی کو بہتر بنایا جا سکے۔
تاہم واضح کیا گیا ہے کہ ان اصلاحات کے باوجود قومی فضائی کمپنی کا قومی تشخص، برانڈ ویلیو اور شناخت سے متعلق معاملات جوں کے توں برقرار رہیں گے۔ حکومت اور متعلقہ اداروں کا مؤقف ہے کہ پی آئی اے کی تاریخی اور علامتی حیثیت کو متاثر نہیں ہونے دیا جائے گا اور اس کی پہچان کو محفوظ رکھا جائے گا۔
سول ایوی ایشن ذرائع کے مطابق اس فیصلے کا مقصد یہ یقینی بنانا ہے کہ نجکاری کے بعد بھی پی آئی اے نہ صرف تجارتی اعتبار سے مضبوط ہو بلکہ قومی سطح پر اس کی اہمیت اور علامتی حیثیت بھی قائم رہے۔ حکام کا کہنا ہے کہ نئے انتظامی ڈھانچے اور مالی اصلاحات کے ذریعے پی آئی اے کو ایک مستحکم اور منافع بخش ادارہ بنانے کی کوشش کی جائے گی، جبکہ اس کا قومی کردار اور شناخت برقرار رہے گی۔
By 
