پاکستان کی متوازن سفارتی پالیسی اور اُبھرتا عالمی کردار دنیا کی توجہ کا مرکز، عالمی جریدہ دی ڈپلومیٹ بھی معترف

پاکستان کی مؤثر اور متوازن سفارتی پالیسی اور ابھرتا ہوا عالمی کردار تیزی سے دنیا کی توجہ حاصل کر رہا ہے، جبکہ اس کی خارجہ حکمتِ عملی کے مثبت نتائج بھی واضح طور پر سامنے آنا شروع ہو گئے ہیں۔

عالمی جریدہ دی ڈپلومیٹ کے مطابق بہترین سفارت کاری کی بدولت پاکستان خطے میں مرکزِ نگاہ بن گیا ہے، جبکہ آہنی برادر چین نے پاکستان کے خطے میں بڑھتے ہوئے مؤثر کردار اور بہترین سفارت کاری کو بھرپور انداز میں سراہا ہے۔

پاک چین دوستی مضبوط سمت میں آگے بڑھ رہی ہے ، دی ڈپلومیٹ

دی ڈپلومیٹ کے مطابق چین پاکستان کو ایک ایسا ملک تصور کرتا ہے جو معاشی طور پر مضبوط ہونے کے ساتھ سرحدوں سے باہر بھی مؤثر کردار ادا کر رہا ہے۔

رپورٹ میں کہا گیا ہے کہ امریکا سے اچھے تعلقات کے ساتھ ساتھ پاک چین دوستی بھی مضبوطی سے درست سمت میں آگے بڑھ رہی ہے جبکہ چین پاکستان کے عالمی اور علاقائی معاملات میں اہم کردار کی بھرپور حمایت کرتا ہے۔

عالمی جریدے کے مطابق چین پاکستان کو سلامتی کونسل اور شنگھائی تعاون تنظیم کی صدارت کے لیے بہترین اور موزوں تصور کرتا ہے جبکہ پاکستان بھی چین کے ساتھ متعدد شعبوں میں اسٹرٹیجک شراکت داری کو انتہائی اہم سمجھتا ہے،  چین نے ایک بار پھر پاکستان کی خودمختاری، آزادی اور علاقائی سالمیت کے تحفظ کے لیے اپنی مسلسل غیر متزلزل حمایت کا اظہار کیا ہے۔

یہ بھی پڑھیں : بیجنگ میں اسٹریٹجک ڈائیلاگ، چین اور پاکستان کے ’آہنی‘ تعلقات کی توثیق، مشترکہ اعلامیہ جاری

دی ڈپلومیٹ کی رپورٹ میں کہا گیا ہے کہ چین نے مسئلہ کشمیر کے سلامتی کونسل کی قراردادوں کے مطابق حل پر زور دیا ہے جبکہ افغان صورتحال پر بھی چین نے افغان طالبان سے مطالبہ کیا ہے کہ وہ جامع حکومت قائم کریں اور شدت پسندوں کے خلاف قابلِ تصدیق کارروائی کریں ۔

چین نے پاکستان کے مؤقف کے مطابق افغان حکومت پر اعتدال پسندی اختیار کرنے اور پڑوسی ممالک کے ساتھ اچھے تعلقات قائم رکھنے پر بھی زور دیا ہے۔

عالمی جریدے دی ڈپلومیٹ کے مطابق چین خطے اور عالمی سطح پر پاکستان کی موجودہ پالیسیوں کی بھرپور حمایت کر رہا ہے، ماہرین کا کہنا ہے کہ خطے اور عالمی سطح پر پاکستان کی موجودہ پالیسیوں کی حمایت دراصل پاکستانی مؤقف کی بھرپور توثیق ہے، جبکہ پاکستان کی بہترین سفارتکاری اور دہشت گردی کے خلاف واضح مؤقف پر عالمی جریدہ دی ڈپلومیٹ بھی سراہے بنا رہ نہیں سکا ہے۔