کل ملک بھر میں انٹرنیٹ بند رہے گا؟ وجہ سامنے آگئی

پاکستان بھر کے انٹرنیٹ صارفین کو 15 جنوری کو سست رفتار انٹرنیٹ اور ممکنہ سروس میں تعطل کا سامنا کرنا پڑ سکتا ہے، کیونکہ ملک کی ایک اہم بین الاقوامی سب میرین انٹرنیٹ کیبل پر مرمتی کام طے کیا گیا ہے۔

میڈیا رپورٹس کے مطابق انٹرنیٹ سروس فراہم کرنے والی کمپنی نیا ٹیل (Nayatel) کا کہنا ہے کہ یہ مرمتی کام دوپہر تقریباً 2 بجے شروع ہوگا اور اس کی تکمیل میں لگ بھگ آٹھ گھنٹے لگ سکتے ہیں۔ اس دوران ملک بھر میں انٹرنیٹ سروس کی کارکردگی متاثر ہونے کا امکان ہے۔

نیا ٹیل کی جانب سے صارفین کو ارسال کی گئی ای میل میں بتایا گیا ہے کہ یہ مرمت ایک بین الاقوامی سب میرین کیبل پر کی جا رہی ہے اور یہ کام ناگزیر ہے۔ کمپنی نے کیبل کی درست جگہ یا خرابی کی نوعیت سے متعلق تفصیلات فراہم نہیں کیں، تاہم صارفین کو انٹرنیٹ کی رفتار میں کمی یا جزوی تعطل کا سامنا ہو سکتا ہے۔

ماہرین کے مطابق سب میرین کیبلز پاکستان کے بین الاقوامی ڈیٹا ٹریفک کے لیے نہایت اہم ہیں، اور ان میں کسی بھی قسم کی خرابی کے باعث براؤزنگ، اسٹریمنگ، آن لائن کام اور دیگر ڈیجیٹل سہولیات متاثر ہو سکتی ہیں۔

یہ بھی پڑھیں: ملک میں انٹرنیٹ سروس متاثر ہونے کا امکان ! مگر کب؟ صارفین کیلئے اہم خبر

واضح رہے کہ رواں ماہ کے آغاز میں بھی ملک بھر میں بڑے پیمانے پر انٹرنیٹ سروس میں تعطل دیکھنے میں آیا تھا۔ یکم جنوری 2026 کو صارفین نے شدید انٹرنیٹ سست روی اور بندش کی شکایات کی تھیں، جو ایک اپ اسٹریم انٹرنیٹ فراہم کنندہ میں خرابی کے باعث دو دن سے زائد جاری رہی تھیں۔

پاکستان عالمی انٹرنیٹ رابطے کے لیے محدود تعداد میں سب میرین کیبلز پر انحصار کرتا ہے۔ اگرچہ مرمتی کام ناگزیر ہوتے ہیں، تاہم ان کے اثرات صارفین پر نمایاں طور پر مرتب ہوتے ہیں۔ مرمت کے دوران ڈیٹا کو متبادل راستوں سے منتقل کیا جاتا ہے، جس کے نتیجے میں انٹرنیٹ کی رفتار متاثر ہو سکتی ہے۔

نیا ٹیل اور دیگر انٹرنیٹ سروس فراہم کرنے والی کمپنیوں نے صارفین کو مشورہ دیا ہے کہ وہ مرمتی عمل کے دوران اپنی اہم آن لائن سرگرمیوں کی پیشگی منصوبہ بندی کریں تاکہ ممکنہ تعطل سے بچا جا سکے۔

یہ بھی پڑھیں: بارش برسانے والا نیا سسٹم کل پاکستان میں داخل ہونے کو تیار، بارش کا کتنا امکان؟