اٹلس ہونڈا نے پاکستان میں ہونڈا سی بی 125 ایف 2026 ماڈل متعارف کروا دیا ہے، تاہم اس بار کی تبدیلی صرف نئے اسٹیکرز اور باڈی گرافکس تک محدود ہے۔
موٹر سائیکل میں دیگر فیچرز میں کوئی فرق نہیں کیا گیا، اور اینالاگ اسپیڈومیٹر، ہیلو جین لائٹس اور سادہ ڈیجیٹل فیول گیج ویسے ہی موجود ہیں جیسے پرانے ماڈل میں تھے۔ صارفین جو جدید ٹیکنالوجی جیسے ایل ای ڈی لائٹس، ٹی ایف ٹی ڈسپلے یا بلیوٹوتھ کنیکٹیویٹی کے خواہاں تھے، انہیں اس بار بھی پرانے ڈیزائن پر اکتفا کرنا پڑے گا۔
ہونڈا سی بی 125 ایف کے مثبت پہلو برقرار ہیں، جن میں مضبوط اور دیرپا بلڈ کوالٹی، آرام دہ شہر میں سواری، قابل اعتماد انجن کارکردگی شامل ہے تاہم تقریباً چار لاکھ روپے کی قیمت کے باوجود جدید فیچرز کی کمی کی وجہ سے ہونڈا اپنی کچھ حریف کمپنیوں سے پیچھے رہ گیا ہے، جس پر کچھ صارفین نے سوشل میڈیا پر بھی تبصرہ کیا ہے۔
موٹر سائیکل کی قیمت 396,900 روپے رکھی گئی ہے۔ انجن کی گنجائش 124.1 سی سی، چار اسٹروک او ایچ وی ایئر کولڈ ہے اور اس میں پانچ رفتار کی مسلسل میش ٹرانسمیشن موجود ہے۔ فیول کیپیسٹی 12.3 لیٹر ہے جس میں 2.7 لیٹر کا ریزرو شامل ہے اور وزن 122 کلوگرام ہے۔ یہ موٹر سائیکل ریڈ، بلیک، بلیو اور وائٹ رنگوں میں دستیاب ہے۔
اسی دوران ہونڈا پاکستان نے ہونڈا سیوک 2026 فیس لفٹ کے ماڈلز کی ابتدائی قیمتیں بھی جاری کر دی ہیں۔ کمپنی کے مطابق تمام ورژنز میں ہونڈا سینسنگ کو معیاری فیچر کے طور پر شامل کیا گیا ہے اور فرنٹ گرل کے ڈیزائن کے ساتھ ساتھ ایکسٹیریئر اور انٹیریئر میں بھی کچھ تبدیلیاں کی گئی ہیں تاکہ ڈرائیونگ کے دوران حفاظت اور آرام میں بہتری آئے۔ ہونڈا سیوک اسٹینڈرڈ ماڈل کی ابتدائی قیمت 8.499 ملین روپے رکھی گئی ہے۔
ماہرین کے مطابق اگر صارفین مضبوط اور قابل اعتماد موٹر سائیکل یا کار چاہتے ہیں تو ہونڈا سی بی 125 ایف اور سیوک فیس لفٹ اب بھی محفوظ انتخاب ہیں، لیکن جو صارف جدید ٹیکنالوجی اور جدت چاہتے ہیں، انہیں صرف نئے اسٹیکرز والی سی بی 125 ایف زیادہ متاثر نہیں کرے گی۔
By 
